最近網上流傳一短片，片內小朋友在 澳門巴黎人 酒店的兒童遊樂設施瀡滑梯時，於彎位拋出滑梯外，高聲尖叫同時飛跌在地上，令不少家長們都高呼怕怕，更表明使用遊玩設施時，一定要睇實小朋友。為跟進事件，GOtrip 編輯特地訪問了事發小朋友的家長 Alvin 講述事件。
飛出滑梯跌倒地上 幸無大礙
據 Alvin 描述，他們一家於聖誕節當晚入住澳門巴黎人酒店，並在 12 月 26 日退房後前往位於巴黎人 6 樓的兒童遊樂場。Alvin 兒子在同一滑梯玩了 5-6 次，頭幾次一切正常，最後則出現片段中慘況。幸好室內兒童遊樂場鋪有軟墊，Alvin兒子只係「擦紅少少」，但都唔敢再玩同一位置嘅設施。
工作人員反應不大 家長終去信提建議
Alvin 事後將影片放上個人 facebook 分享，最初他於留言提到不打算投訴，因為事發當時現場的工作人員在看到小朋友無大礙後，就未有再理會，但最終仍於 12 月 29 日發電郵建議酒店跟進兒童遊樂設施的安全問題，而酒店方面亦指於互聯網上觀看到影片，會派相關同事跟進。
影片掀起熱烈討論 更多「中招」家長發聲
小朋友雖無大礙，但片段被轉載至facebook群「澳門高登起底組」後，引來大批家長留言抱不平。
留言中仲發現原來同類事件已經唔係首次發生，好多家長都表示心痛！
有家長更早在9月試玩日時遇上類似情況，當時更發信投訴。今次意外可見，事隔三個月，情況仍然未見改善。
其實喺9月3日試玩日，我個女差少少拋出滑梯後，已經寫信給公司反映此問題，估唔到而家都未有人跟進。
不過 Alvin 強調，將片段放上 facebook 並唔係針對巴黎人，只想提醒各位家長帶小朋友去室內或室外遊樂場玩嘅時候，千祈不要大安旨意。睇實小朋友，安全至上，避免類似意外發生！
