呢件事發生喺我同女朋友去 澳洲 工作假期 期間，當時同佢為咗份農場工，由市區坐八個鐘頭火車到達目的地，一個叫 Mildura 嘅農業小鎮。
工頭安排咗我同女朋友去一個大型杏仁農場工作，先畀大家了解個杏仁農場有幾大。進入農場後，開車時速約 50km，沿住大路一直行，泥路兩旁種滿密密麻麻嘅杏仁樹，由入口去到農場盡頭，需要約 15 分鐘時間。
每日，都會有 30 個背包客浩浩蕩蕩咁嚟農場返工，而工頭亦幫各員工安排咗農場周邊嘅住宅，收番你租金……
冇錯啊～工頭就係喺你嘅薪金度抽佣、賺你住宅租金、可以隨時叫你唔使返工，佢走數欠薪，人間蒸發你都冇仇報嘅吸血大魔王（有興趣再講）！
而我同女朋友就被安排咗喺上圖嗰間屋度住，一屋 12 人，每間房瞓 4 個，當我第一眼望見呢間屋，已經同女朋友講：
「呢間屋睇外表就知一定有鬼啦……」
「你咪嚇我啦！要喺度住幾個月呀！」
「外殼殘舊啫！希望入面裝修好少少啦……」我安慰自己。
可惜，間屋嘅內部情況，比起外表睇更加惡劣，周地都係沙，浴室又濕又多頭髮，雪櫃腥臭，廚房仲有陣油味。但冇辦法，為咗份工，都要硬住頭皮咁住。
不過，住咗一排先發現，間屋污糟其實都唔係太大問題……
最大問題係，真係被我講中，間屋有鬼！
話說女朋友幾乎每晚半夜都會去廁所，但佢又驚，所以一定會拍醒我陪佢去。間屋嘅構圖大約係，一個正方形飯廳，開放式廚房，轉入走廊就係廁所、浴室、睡房……
而當我喺廁所門外走廊等緊嘅時候，經常都會見到飯廳有隻手好快咁伸出嚟又縮番入去，我試過膽粗粗行出廳睇下，但見唔到任何嘢。因為呢間屋起碼要住幾個月，為免嚇親女朋友，我冇將呢件事話佢知，呢段期間，我起碼見過呢隻怪手 5～6 次。
幾個月後，因為杏仁季節已過，我同女朋友離開 Mildura，揸車去另一個地方繼續搵工。喺一個風和日麗嘅下午，女朋友心情歡愉咁喺架車度唱緊歌，我就打算以一個輕鬆心情同佢講番呢件事……
「Yo～你知唔知呢～其實之前住嗰間屋有鬼～」
「係啦！我都覺得係啊！」
「所以你諗下，我一個人喺門外面係幾恐怖嘅一件事。」
當我想講怪手伸出伸入件事畀女朋友聽之際，佢突然間講咗句…..
女朋友：「你喺外面恐怖？我自己一個喺廁所入面仲恐怖啊！不過費事嚇親你，所以一直唔講你知咋！我有幾次去廁所，都聽到有人喺外面敲牆啊！」
我聽完佢咁講，當場橙軀一震……
到最後，我都冇將怪手事件講出嚟，默默咁承受住呢份雙重恐怖……
