每年一到5、6月，又係動腦筋同屋企人去邊度玩嘅時候。老婆話今年想衝出亞洲，咁我就乖乖做定功課。難得一家四口去旅行，梗係跟團最舒服。去歐美，隨時飛十幾個鐘，太辛苦喇！思前想後，都係 澳洲 最好，坐澳航直航，夜晚8點幾上機，大約9個鐘，瞓醒一覺落機就可以玩，超正！
直闖 澳洲 酒莊邊走邊飲 坐埋蒸汽小火車最呃like
其實今次揀呢個團，我都係有私心的！我向來鍾意紅酒，而雅拉河谷Yarra Valley就是當地著名產區，大大細細酒莊夾埋超過80間，今次領正牌任睇任試，開心到暈。你知唔知呢度出產嘅Pinot Noir又平又好飲？等我趁機會入番啲貨，返香港同班老死分享先！
剩係去酒莊，老婆同對仔女一定唔制！放心，仲會去埋布列頓海灘(Brighton Beach)曬下太陽玩下水，就係成日喺明信片見到好多彩色小屋嗰個靚沙灘，一於影張全家福上facebook打個卡喇！不過我估阿仔最開心應該係可以坐到蒸汽小火車，呢架Puffing Billy Railway係 澳洲現時最古老的蒸汽火車之一，已經有百幾年歷史，復古的車廂，一邊開動，一邊仲有嗚~嗚的鳴笛聲，簡直係Thomas火車的現實版。
雅拉河谷是澳洲其中主要的葡萄酒產地，單是酒莊都有80家，去到記得盡情試、盡情買。
時常在明信片見到的沙灘小屋，是布列頓海灘的重要地標，selfie一番是指定動作吧！
落手落腳淘真金 見證企鵝愛回家
至於阿女，就最鍾意睇動物，平時動物園都去唔少，今次可以去Penguin Parade近距離等神仙企鵝回巢。每日黃昏時分，覓食回來的企鵝會左搖右擺地返回沙灘，是1齣現成的生態教育奇觀。所謂讀萬卷書不如行萬里路，阿仔阿女真係幸福，以前我哋讀歷史講19世紀淘金熱，一切都係靠想像，依家佢哋有機會親身去琉芬山金礦場 Sovereign Hill淘金，跟住穿古裝的工作人員騎住馬車去金礦洞體驗，有得玩之餘，仲有嘢學。
遊客可以守候在神仙企鵝棲息地Penguin Parade，近距離等牠們回家。
去琉芬山金礦場有如回到19世紀，可以體驗瘋狂的淘金年代。
遊客坐馬車穿梭在古色古香的建築中，時空交錯，是有趣的體驗。
玩多4日 去埋大堡礁熱帶雨林
聽起來5日行程，相當豐富，全家都滿意了。準備報名之際，我遇上另一大問題：原來仲有個9日團，俾多幾千蚊，就可以坐內陸機去黃金海岸，抱埋樹熊，睇埋袋鼠，順便去埋世界聞名的大堡礁。大堡礁有幾靚就聽得多，但就真係未見識過。能夠喺嗰度玩浮潛，真係諗起都開心。
澳洲的自然資源真係得天獨厚，唔止有靚沙灘黃金海岸，仲有熱帶雨林，坐住海陸兩用車玩熱帶雨林，跟手睇埋土著的回力鏢表演，又真係幾歎！再唔係坐船遊翠兒河，即捕即食大泥蟹，再喺船上食埋依家當造的南半球生蠔。回程時，最緊要留番啲時間俾老婆在悉尼shopping。咦！諗諗下，去9日似乎鬆動啲，又盡興啲喎！都係快啲返公司請定假先最穩陣。
