人在外地還是香港，港媽到一地都係，我自己就遇過唔少，簡直反白眼翻到天靈蓋。
1｜你教仔但我趕時間
每次我趕頭趕命搭?時，總會遇上港媽「悉心教導」小朋友，「茄墳～襟六字啦！」接著小朋友花了一分鐘才找到6字樓在哪裡，然後戰戰兢兢地按樓層，我心裡無明火起，大佬趕時間啊，嗱嗱聲閂門啦！或者等下次冇乜人，你才教小朋友好不好？
同樣事件，發生喺所有扶手電梯上。其實香港人多擠迫，電梯上總是非常擁擠，如果任由小朋友自己站著或者慢慢行，其實都會阻到後面的人，又危險！要學走電梯，可不可以不要選擇在一個人流千萬的商場內呢？
利申：我冇小朋友我係唔知，但是你阻住我就知。
2｜溫咕咕餵食
我明白你母愛大爆發，但是坐在旁邊，聽到港媽說：「Jayden ～快啲食菜菜啦！」「哎吔奶奶呀，好心你幫佢剪細啲先食啦～」不斷重複10次，我想自殺，然後大叫：「佢唔X想食，就唔好畀佢食啦！」如果中間夾雜港式英語，更加想捉個阿媽去再培訓，「Jayden ～快啲食仆Co-li～」
3｜大聲開iPad
「Sabrina ~ Dis is pig~~」
「霹靂啪喇霹靂啪喇~~」
「豬好nice屎。」
OK，你開電子奶嘴給小朋友看，都算了，自己又要用唔鹹唔淡的英文解釋， iPad又直接開聲，在旁邊其實聽不到Peppa Pig 或者Baby Shark，只是聽到一堆霹靂啪喇聲，非常擾民，極度乞人憎。其實是否需要每秒鐘都那麼有教育性呢？嗰啲迪士尼ABC呀Thomas呀，可否用一本書代替呢？
4｜魯莽駕駛嬰兒車
推住架車就唔該小心啲，亂衝亂撞，非常危險，香港空間如此細，嬰兒車實在是應該小心駕駛！打開時，也請望望後面有冇人，因為你撞到我呀，小姐。
5｜由得BB喊
「喊喊下就唔會喊㗎喇！」
「由得佢喊囉！佢扭計之嘛！」
冇錯，對你來講，你已經聽慣自己小朋友的喊聲，我知道你為他上了一堂「扭計並不能夠得逞」的課，但是你的孩子喊聲震天，聞者煩心，聽者耳聾，你教仔我絕對唔阻你，大前提是，不要打擾到別人。
