港媽不滿孩子被投訴：「你哋對小朋友都冇愛心嘅！」
同事：「唔好意思啊太太，介唔介意叫小朋友唔好跑呢？因為怕我哋做嘢撞到佢哋啊！」
老母：「人哋鬧 喇！仲 唔 坐 好？」（佢嘅語氣係覺得我哋話佢對小寶貝。）
隔咗陣，安全帶燈著咗，佢哋就坐低咗，但開始用腳踩前面個香港女仔嘅椅背喎，個女仔就叮我哋幫手。
我：「太太，唔好意思啊！麻煩你叫小朋友唔好踩前面嘅椅背吖，因為會影響到其他乘客休息嘅。」
老母：「咩啫！小朋友玩下之嘛，使唔使投訴啫！你哋對小朋友都冇愛心嘅。」
我：「嗯！我幫你反映畀其他乘客聽吖，因為你前後兩排五位乘客都投訴緊小朋友。」
老母：「小朋友之嘛！」
大叔一句KO：「我喺我老母心目中都係小朋友！」
隔咗陣，個老母叮我哋出去，原來係佢後面個叔叔用番同樣嘅行為頂佢嘅椅背，要投訴喎！
阿叔：「我喺我老母心目中都係小朋友，阿姑你包容下啦！」
嗰下我真係忍唔住笑L咗出嚟，阿叔真係好堅，佢老母八十幾歲人仲喺佢隔籬，阿叔真係小朋友喎！
跟住落嚟嘅八個鐘，嗰兩個細路靜晒，個老母靜晒，而個老竇全程好似唔識三仔乸咁樣，睇咗N套戲⋯⋯
唔好以為大媽先會講啲咁嘅說話，香港的媽媽都會嘅！
