父母去旅行講廣東話 港人上網怨爆嫌失禮：真係好冇面
網民於連登討論區發帖，講到之前帶雙親去日本旅行時做出很多「失禮行為」，例如在餐廳內對侍應講：「要一個呢啲！要兩個呢啲！」又會在酒店check-in時，對接待員狂講中文發爛渣，令他感到相當失禮，更委屈道：「我英文超廢都忍唔住幫佢搞掂算，廢時（場面）咁尷尬。」
有部分網民其實都深有共鳴，話：「（年長港人）去邊都要講中文，以為全世界都識中文。」又表示自己在日本曾經見過有年長港人的烏龍事：「喺車排隊換飛，見到前面個香港人阿伯同個職員講：『Use the 都會票……』」有網民見此，建議如果不懂當地語言，還是跟團比較好。
網民睇唔過眼：老人家旨意你㗎嘛！
亦有網民看不過眼，就指：
「你都識講你英文好屎，全家最有希望嘅你，去旅行又溝通唔到，點旨意你啊？兩老咪惟有用中文囉！」
「自己文化水平高少少，笑X自己父母？」
「樓主仲唔學好英文，第時你咪係一樣」
「你父母既然唔會講英文，點解買嘢食你唔負責落order，在酒店又由父母去櫃檯check-in，而係企喺到做旁觀者，令父母難堪。都唔知邊個帶邊個去遊行，乜都由得父母去做，你仲好意思講嘅？」
「帶得父母去旅行就預咗同必需照顧佢哋，唔通你扔低佢哋人生路不熟自生自滅？嫌煩埋跟團囉，等導遊領隊照顧。」
「咁如父母淨係識廣東就失禮你，我建議你父母以後跟團都唔好跟你去旅行，父母有尊嚴地去旅行」
網民提供絕佳方法：嗌Subway你都識叫This This This啦！
又有網民給出了一個絕佳方法，就算英文再不濟，懂得「this」就可以了：「This this this就得」、「對住日本人講好正經英文……其實this this this人哋仲易明」！略嫌有點尷尬？亦可以選擇用升級版：「これ、これ、これ（Kore、kore、kore/這個、這個、這個）。」進一步貼近當地風情。
