【泰國芭堤雅動物悲劇】去得東南亞地區旅行，好多時都會有「騎大象」嘅環節，無論「打卡」或者當係個異國體驗，但係，當大家享受呢個過程時，又有冇諗過，其實係將自己快樂，建築喺別「象」痛苦身上？日前喺泰國芭堤雅，就有遊客見到一件象媽媽同小象載遊客時發生嘅悲劇。
撰文：Evita | 編輯：J｜圖片：YouTube截圖（原文刊於《新假期》）
泰國芭堤雅小象疑因太熱不支倒地
根據《每日郵報》報道，有菲律賓遊客於上星期到泰國芭堤雅東芭樂園（Nong Nooch Tropical Garden）旅行時，拍攝到一隻小象頸被綁繩，連繫住正在被遊客騎嘅象媽媽。
遊客指當日氣溫高達攝氏40度，期間小象可能因為太熱而倒地。不過小象瞓低唔夠半分鐘，象媽媽就用鼻掂一掂象仔示意起身工作。
遊客：「樂園內有很多小象被繩連繫母象走來走去，遊客們享受的背後就是象在陽光底下受苦。」
遊客同時表示擔心大小象嘅健康，甚至遭受虐待，希望佢哋可以得到妥善照顧。而東芭樂園發言人就否認大象受虐待或太攰，更話：「所有大象都好健康，待遇好，如果有問題會被獸醫治療。」
而早前就有一隻叫Dumbo嘅小象喺泰國南部嘅一場表演中去世，有指Dumbo每日被逼表演3次，飼養員帶佢到獸醫診所時掃描發現兩隻腳都斷了，再過多三日就去世。
好多時候我哋希望喺旅行中嘗試未試過嘅「玩樂」，但係希望大家喺作出決定前要先考慮動物或其他人嘅感受，以免再有更多同類事件發生。