冇錯！編輯S曾在情人節當日去中環海濱的玫瑰燈海園 Light Rose Garden ，人潮迫爆、趕鴨式入場，結果白花在腳邊匆匆略過，唔知睇咗啲乜，如此掃興場面，竟然還見到有人求婚！
男士注意：
- 在女生心目中，求婚一定要浪漫！
- 最好別在太擠迫的環境，一來人多尷尬，二來至少要預留跪地空間！
- 原則要記住：進可攻、退可守，小心圍觀花生友！
7 點到場，第一個失誤係自己冇做足功課，發現「中環海濱」原來唔喺中環出閘！完全行錯路，好在冇嗌交；兜回金鐘海富A出口，隨人潮迫上天橋，才發現實情不妙，人多到根本看不到花！好不容易排隊入到場，如果你要影花，那麼恭喜你！你要再迫過！
員工突然呼籲「散開！散開！」
擠了約二十分鐘，終於「攝」入花壇之間的窄路，見到少少花，突然聽到站在花圃內的工作人員大叫：「向後退！有人要求婚呀！你哋一路咁向前推，佢跪唔到落地呀！」
求婚男尷尬單膝跪地
之後人群的確停止向前推，不過空間仍然好細，於是站在求婚情侶身後的一名男士開聲幫拖：
「喂！有人求婚呀！大家唔好再推！同埋畀啲掌聲吖！」
那一刻，我好自然就認為那名男士是求婚男的兄弟、幫手搞氣氛，兼夾控制場面啦！而求婚男都勉強單膝跪地。
大概是群情起哄加上現場出乎意料的擠迫，求婚男士顯得勁尷尬，倉皇失措多過情深款款。雖然我正正站在求婚情侶身邊，不過完全聽不到他的求婚台詞！至於女方，似乎沒有很感動的反應！
花生友騎劫聲援，求婚男勁尷尬
同一時間，無數閃光燈都由花海轉移瞄準二人，瞬間變主角，感覺似藝人被N個鏡頭影住一樣。
之前幫手帶動氣氛的那名男士，又再起哄：「大聲啲啦！聽唔到呀！」然後還帶起人群叫囂，這時候我開始發現熱心男原來只不過是圍觀的花生友路人甲。
終於，求婚完成，女方急急點頭，（編按：焗上轎，其實仲可以點答？）當求婚男想起身時，工作人員竟然制止住：
「你好似仲差啲嘢未做！」
在無數雙眼睛盯著底下，求婚男秒速吻了女方一下，現場（同樣也由花生友帶起）一片掌聲！
求婚男匆匆拖著「未婚妻」離開！老實講，作為女士，我完全唔覺得感動，戥女事主感到汗顏！
