每一次出國旅行、離開屋企，媽咪永遠都係最緊張嗰個：
「攞齊證件未呀？」
「齊喇～」
「附近有冇朋友同你一齊去呀？」
但有時唔想佢擔心太多，就會講一句善意謊言：
「有呀～」
但其實，有時朋友住到鬼咁遠，有時都只能直接喺機場等。
「你夠唔夠錢使呀？」
「去到機場記得打畀我呀！」
「去到嗰邊，記得得閒send啲相嚟睇下～」
.
可能行李太多，又或者太多嘢未執？
唔多唔少，有時都會有啲脾氣。
「得喇得喇！我咁大個人有分數啦～！」
.
或者有時候，你會覺得佢哋好煩、好長氣，
但我哋可能仲未體會到，做人父母嘅永遠都係覺得仔女長唔大，永遠都係會擔心佢哋。
.
有時我哋一大班朋友，開開心心、熱熱鬧鬧出發去旅行，
都唔會太擔心有咩問題，或者亦體會唔到父母所擔心嘅事。
但如果試過一個人搭飛機、一個人轉機、一個人喺機場等十幾個鐘，甚至成個旅程都係自己一個，
當你回望番嗰句「長氣」說話，
其實，嚟得好窩心溫暖。
.
人來人往，機來機往
半個月嚟已經坐過唔少次機，
返嚟香港前一晚，收到媽咪短訊：
「萬事小心呀～平安回家。」
呢一刻，唔知點解我唔覺得佢「長氣」，
反而，我感受到一種溫暖感覺。
.
.
由細到大，我同媽咪感情都好好，
或者因為細個受傷入過醫院，媽咪要連日嚟屋企醫院兩邊走，睇得出佢真係好攰。
我亦都同自己講，我要孝順佢。
.
但有時我會喺度諗，其實要做啲乜嘢先叫孝順呢？
畀好多家用？多啲返屋企食飯？
或者以上可能都係，我都唔太清楚肯定。
不過好好哋咁愛錫自己，
繼續健健康康生活，唔好再令佢哋擔心，
或者，咁樣就係孝順嘅一種～
.
PS：有時一個人去旅行，會發現原來自己真係可以獨立、照顧到自己，有另一番得著。
個人動態:) Ig： hottofuzai
https://www.instagram.com/hottofuzai/
更多文章 fb： 熱豆腐仔
https://www.facebook.com/hothottofu/
