【東京迪士尼樂園】就算唔係迪士尼嘅fans，嚟到東京都總會去東京迪士尼樂園/東京迪士尼海洋玩。不過主題樂園唔止吸引國外遊客，亦深受日本人嘅歡迎，每個遊戲都大排長龍！高人氣嘅遊戲設施甚至要排起碼2個鐘！所以除咗排玩遊戲，連攞快證都大排長龍！有見及此，東京迪士尼方面便計劃推出手機攞快證，慳番大家排快證機嘅時間。
撰文：C｜圖片：東京ディズニーリゾートPR【公式】
東京迪士尼樂園 快證服務
東京迪士尼現時提供快證嘅遊戲，有「Space Mountain」、「Toy Story Mania」等，等候時間長嘅，一共18個機動遊戲。各機動遊戲前，會有快證發票機，領取後，只需按證上嘅顯示時間返回相應遊戲所在地，就可以幾乎唔使等咁直入玩遊戲。雖然係免費領取，但排隊領快證嘅人龍都絕對唔短。
夏天開始推行手機領快證
由今個夏天起，只要位處園內，都可以直接用手機領取機動遊戲嘅快證，唔需要再親身去快證發票機攞。而取得一次快證後，需要等待一定時間後，才可再領取另一張快證等規則不變。考慮到唔帶智能手機入園嘅客人，快證發票機將會繼續提供服務。
東京迪士尼海洋預計會喺7月23日開幕嘅新機動遊戲「Soarin’」啟用前，開展手機領快證服務。