撰文：藍橘子｜編輯：AY｜資料來源：LIHKG 討論區｜圖片來源：新傳媒資料室、unsplash
最伏旅遊地方 貼錢都唔會再去？
開放討論：去過最唔鍾意嘅國家！
以下為我的個人經歷：
我先拋磚引玉，我自己對於部分歐洲國家印象唔太好，雖然風景同建築物真係好靚，去參觀皇宮同博物館亦係其他國家睇唔到。不過，意大利同法國嘅服務態度相對就比較差，通街都係小偷、簽名黨、合照黨，去到鐵路站唔識買車飛，你問職員都未必會教你。被人偷咗銀包，想問巡邏緊嘅警察可以去邊度搵警察局報失，佢答我因為巡邏緊，唔可以答我問題……
另一方面，如果要我揀「去過一次就唔會再去」嘅地方，我諗我會揀峇里。雖然我好鍾意潛水，但嗰次去咗兩個地方浮潛，其中一個船家話，峇里其實好多珊瑚都石化晒，所以落到海底，睇嘅都係白色一片。
如果想喺酒店relax，有更多唔同國家選擇，潛水亦可以去馬來西亞鄰近嘅小島，同埋峇里嘅食物，我個人口味真係不敢恭維。
每個人意見都可能唔同，點解要攻擊對方呢？
睇到呢度，我相信大家已經咬牙切齒，亦一定有唔少反對嘅聲音。「我覺得歐洲好正！」「只係你唔識玩啫！」「我好鍾意峇里囉！」
討論「最唔喜歡」嘅國家/城市，一定會引起反對聲音，因為大家都唔樂於接受自己喜歡嘅事物被批評。但如果今次係討論「最喜歡」旅遊國家/城市，只會各自發表意見，因為每個人都有自己鍾意嘅嘢，有辣有唔辣，任君選擇。
對待身邊嘅事物多啲認同，少啲批評！
其實，待人處事亦都一樣！批評/踩低其他人係一件好簡單嘅事，但對方一定會因為接受唔到而反擊，結果變成雙方罵戰。如果將批評變成讚美，例如上網見到香港運動員喺外國奪佳績，讚一讚佢。就算輸咗，起碼有努力過，都給予讚賞。
對待身邊嘅人或事物，多啲認同，少啲批評，相信呢個世界會更美好，香港人嘅快樂指數亦一定會上升番（少少）。
