【日本Suica PASMO】去日本想玩得方便啲，大部分旅客都會選擇買一張日本版八達通，俗稱「西瓜卡」嘅Suica，又或者另一款卡PASMO，可以省卻唔少望住塊車站圖搵目的地、搵所需車資、排車票機買票嘅時間。一直以來，要買一張Suica、PASMO都需要繳付500円（約HK$35）按金，近日日本方面終於落實推出全新遊客專用版！新卡更方便旅日遊客。

撰文：C｜圖片：JR東日本、PASMO

遊客專用 免按金日本Suica、PASMO卡

主要用作交通卡使用嘅「Suica」和「PASMO」宣布增設外國遊客專用卡種！由JR東日本發行嘅新Suica卡名為「Welcome Suica」，新PASMO卡則名為「PASMO PASSPORT」，兩款卡同於9月1日起發售。

一般而言，要發行Suica或PASMO卡，必須繳付500円（約HK$35）按金，新卡則免卻按金，取而代之嘅係，會設立28日使用限期。

Welcome Suica以日本國旗嘅紅、白二色作為主色，再加上日本國花之一嘅櫻花圖案作為新卡設計。按金全免，可使用28日。因為免卻按金，所以旅客離開日本時，唔需要花時間去退卡，可直接將新卡帶回去留作紀念。所有可使用Suica卡嘅鐵路、巴士、商店、的士、觀光設施等均可使用，同一般卡嘅使用範圍無異。須注意卡內餘額都係冇得退還㗎！

價格有1,000円、2,000円、3,000円、4,000円、5,000円、10,000円等6種金額可供選擇。出售地方有：JR EAST Travel Service Center（成田機場站、機場第2大樓站、東京monorail線羽田機場國際線大樓站、東京站、新宿站、涉谷站、池袋站、上野站、濱松町站）、成田機場站、機場第2大樓站。

PASMO PASSPORT

PASMO PASSPORT嘅命名帶有旅遊日本時「第2 passport」嘅意思，同Welcome Suica一樣按金全免。

設計上使用咗Sanrio嘅Hello Kitty、玉桂狗、布甸狗3個卡通人物，主打「可以帶返屋企嘅可愛卡」。使用期限為28日，可用於鐵路電車、巴士，或任何可使用電子錢幣嘅地方。

價格只有2,000円一款（內存1,500円限額+發行手續費500円）。發行地方為成田機場及羽田機場的鐵路車站，亦預定於多外國遊客使用嘅主要車站中發售。購買時，須出示passport以證明外國遊客身分。

日本方面現時仍在商討，於合作店舖出示Welcome Suica或PASMO PASSPORT卡可否獲取優惠等，更多方便外國遊客嘅功能。