日本限飛令港人遊日夢碎 尋轉機方法被嘲肉酸：香港人真係好醜！
日本昨宣布由12月30日凌晨0時開始，中港澳3地旅客只可使用東京成田、羽田、大阪關西及名古屋中部這四個機場升降。換言之在1月1日出發北海道、沖繩等地點的港人航班面臨取消或更改，令享受紅日假期的眾人都突然被重擊一下。各大旅行社、航空公司今日都紛紛發出聲明表示最新安排。惟當大家都緊張不已之時，有網民反以「日本限飛見證香港人有幾肉酸」在討論區嘲諷港人，指「航班cancel咗問可唔可以轉飛去大阪、名古屋嘅又有移民咗日本係度踩低人嘅又有，點解無得飛唔係直接自己改期而老奉要人安排轉機？機場呢D公司開㗎？話轉就要轉」。該網民續指「常理下都取消班機啦，加上位置唔同價錢都唔會一樣，點會問得出可唔可以轉為內陸轉機，要你畀多少少錢你一陣又咁多嘢講」。
港人苦主反擊：問都唔得？
討論更惹來大量回應，而大家的矛頭都指向事主「無理鬧人」，指港人感到無所適從實是應該，當下第一反應必定是問相關公司安排及最可行的解決辦法。網民反指「航班cancel咗，問可唔可以由福崗轉飛去大阪名古屋都唔得咩」、「其實問轉飛點解肉酸？」、「而家人哋問下都唔得，你肉酸啲」，「唔明有幾肉酸喎，班機cancel左緊係要諗方法」、「唔問又點知？真係個個咁有錢當幾千蚊機票錢係碎銀咩？唔問又回知有咩應變措施，咪玩喇」。
帖文事主被鬧到「潛水」 港人：真係唔好自己人難為自己人啦
帖文事主一度堅持，指「班機本身飛福岡，大把人問可唔可以嗰班機轉做去大阪同名古屋，而唔係改日子，你會唔會自己銷假好過」，又指港人面皮厚。不過網民繼續反擊指「而家人哋唔比佢哋飛，假又攞咗，想轉地方好正常姐」、「想個旅程如期進行唔好取消，呢啲叫人之常情，點都唔係叫肉酸，你就真係肉酸啦」。而在網民「追住鬧」的情況下，帖文事主最後更消聲匿跡。
