今次想講講幾個亞洲國家嘅生活文化，睇完可能你會覺得「都係做番香港人期待下打風放假，每年炒下iPhone好過」。
「日本：『不給人添麻煩』的致極」
相信好多人都睇過日本球迷睇完世界杯離場時清理場地垃圾，及小學生去完香港沙灘遊玩後會幫忙執垃圾嘅新聞。
正因為日本教育一直奉行「不給人添麻煩」，所以佢哋喺地鐵唔會傾電話，揸車亦極少響號，更絕對唔會一邊行街一邊食煙……
呢種觀念源自於日本傳統對於村落中破壞者嘅懲罰，叫「村八分」。
當其中一名村民唔守規矩，做出破壞行為，其他村民就會將佢「隔離」。生活最重要嘅十件事稱為「十分」，其中８件事包括成人禮、結婚、產子、病患、建屋、水災處理、祭拜法事、外出旅行，村民對於破壞者完全唔會給予協助。
亦即係話，你結婚生仔唔會有人同你慶祝，去旅行或有水災，亦唔會有人救你。
除非你屋企發生「十分」其餘２件事，埋葬家人屍體同埋撲滅火災之外，成條村都會當你透明人一樣。
「日本最惡毒嘅粗口」
而日本小學嘅老師，都會教導學生：「無論去邊個地方都好，離開時，都要將個地方變得比你嚟之前更好。」
所以去睇世界杯嘅日本球迷，會幫忙清理垃圾，令場地變得更好。雖然呢種觀念令人不禁佩服，但不得不說，做日本人都幾抑壓……
日語嘅粗口非常少，令好多日本人無從發洩心中憂鬱。更有趣嘅係，如果你鬧一個日本人「Ｘ你媽媽」，佢唔會嬲，而係感到無法理解，點解你想Ｘ我媽媽？莫非你對成年女人有特殊癖好？
相反，日本鬧人最惡毒嘅，係鬧一個人無能，唔了解周圍氣氛，破壞氣氛……
由於呢種極度抑壓嘅習性，日本人唔會表露自己嘅內心情感。因為如果自己嘅「喜」、「悲」會對其他人造成擔憂，反而會感到歉意。
總結：
相對於香港人嘅教育觀，從小到大都被父母灌輸「唔好執輸」嘅觀念，子華神最近亦講過「面斥不雅」。當呢幾日見到商家炒膠紙炒到50蚊卷、有人用五毫子當100円用，建設亦懷疑偷功減料。
當各方面香港同大陸愈來愈相似，唯一死守嘅……只係剩番唔好隨街屙屎屙尿呢條底線。
