本來以為只係好小部分 日本餐廳唔歡迎遊客 ，估唔到喺大阪就遇到一次咁嘅情況。
當晚，我同女朋友諗緊晚餐食乜，行過見到一間串燒店幾多日本人食，門口又飄散住串燒香氣，就決定晚餐食呢間啦！點知一入到去，我唔知老闆憑咩去判斷我咩國籍，但一見我打開門都未行入去，就舉起雙手打交叉，指住個「NO CHINESE」嘅牌。
我試圖解釋自己係香港人，但侍應一邊鞠躬say sorry，一邊請我出去。我同女朋友一臉茫然企咗喺餐廳門口，但侍應睇嚟非常堅決，一直企喺門外等我哋離開。
其實我唔係話一定要食呢間餐廳不可，但被拒諸門外嘅感覺非常難受。不過最難受嘅，係自己被誤認係強國人。個老闆一定係受咗極大創傷，先會令佢做出咁嘅行為，對遊客有殺錯冇放過。
香港唔係中國喎！
我有諗過向店員解釋「Hong Kong is not China」，但見佢個樣都一臉無奈，應該係老闆落咗指令，我亦無謂令人難做。我亦都考慮過可能老闆分唔清香港同中國，可能話自己係韓國或者台灣人，會有機會入到去呢～
但諗深一層，如果偽裝成其他國家嘅人，就係為咗入去食一餐飯，咁嘅行為同我哋鄙視嘅強國人有咩分別呢？
事後我一直耿耿於懷，亦同喺日本留學嘅朋友講番呢件事，估唔到朋友一聽就知道我講邊間餐廳。佢話呢間串燒店雖然開喺遊客區，但一直都唔招待遊客，不論係外國定係華人，一樣會被拒諸門外。
至於掛喺門口嗰個「NO CHINESE」嘅牌，純粹出於老闆對於強國人嘅怨恨。
老闆：唔應該要自己國民排隊
點解老闆要咁做？朋友話，老闆了解作為日本人見到屬於自己嘅國家、屬於國民嘅餐廳被遊客擠滿晒嘅感受。佢亦眼見好多出現喺旅遊書嘅餐廳，雖然生意倍增，但變成只做遊客生意，日本人見到咁多遊客，而對餐廳卻步。
佢覺得唔應該要自己國民排隊，而餐廳入面全部都係遊客……所以佢寧願唔畀遊客入去，做少啲生意，都確保日本人去到可以唔使排隊就入到餐廳食串燒。
結果，串燒店喺嗰區大受日本人歡迎，的確，佢生意冇其他餐廳咁好，門口大排長龍，但老闆做得開心，客人又食得開心。
聽完朋友咁講，我由衷佩服串燒店老闆。反觀香港，好多人都話討厭強國遊客，冇禮貌、排隊打尖、屙屎屙尿……但好多人口裡說不，身體卻很誠實，想趕走強國客，但又繼續做佢哋生意。睇下尖咀銅鑼灣嘅名店sales，口講就話好憎強國土豪冇禮貌，但當佢哋招呼香港客，其實一樣黑面，就係因為香港人唔夠豪爽，問長問短，最後先買得一、兩樣嘢……
而且我發現，香港人愈來愈冇禮貌，無論喺香港定去旅行都係一樣，搭港鐵入閘「嘟」慢一秒就被後面嗰個不耐煩怒啤，上港鐵永遠唔畀人落車就一窩蜂湧入車廂……
話唔定不久將來，去到日本，會見到餐廳門外貼上「NO CHINESE AND HONG KONG」 嘅字句……
專頁：http://www.facebook.com/BlueGodZi
Ig：BlueGodZi
