【日本流感】12月有唔少朋友都plan緊去日本玩，順便過聖誕、新年倒數。不過玩還玩，記得小心身體，做好保護措施呀！事關日本正爆發冬季流感，而且疫情蔓延全國。出遊時，謹記勤用番梘洗手及戴口罩！唔好彩中招嘅話，要盡早求醫！
撰文：C ｜圖片：NHK News
日本流感蔓延全國 患者增至8,400多人
日本政府於12月14日宣布，全國進入流感高峰期，呼籲所有在日人士均要勤洗手，以及徹底進行抗流感對策。
根據厚生勞動省嘅資料，截至12月9日嘅一星期中，從全國約5,000間醫療機構所報告嘅流感患者數目，由上星期嘅約3,800人增加至8,400多人，短短一星期增加咗4,600名患者。
目前情況為1醫療機關對1.70名患者，由於超越咗「1」呢個定為「流行期」嘅界線，因此宣布全國進入流感高峰期（以下是相同計算方法）。
以都道府縣計算，四國香川縣患者數目為4.0人、北海道3.96人、愛知縣3.43人、和歌山縣2.90人、鹿兒島縣2.76人，而且全國中，43個都道府縣嘅患者數目都比前一周有所增加。
直至目前所檢測出嘅病毒，有7成診斷為9年前嘅新型流感病毒，並蔓延全球嘅H1N1型，但今後會由咩種類嘅病毒主導，就尚未有把握。
日本政府呼籲，除咗要注意多啲洗手之外，就算症狀輕微都好，一旦有咳嗽或打噴嚏嘅徵狀，就記得要戴口罩。長者則應盡快接種疫苗。大家出遊時記得要小心，多多保持良好個人衛生及環境衛生，慎防感染流感樂極生悲呀！
