日本最基本的生活潛規則，就係唔好騷擾到人。
只要你做的事情唔會騷擾到其他人，基本上無人會理你，包括你肌肉男著Lace裙出街。而如果你的行爲騷擾到其他人，日本人並唔會直接同你講，只會暗地裏不滿，對華人/旅客/香港人減分。直接啲講，即係影衰香港人。
1. 請將音量收細
夜深將音量（包括傾計、電視、手機遊戲、啪啪啪、腳步聲、行李聲等）收細，應該唔使解釋啦吓話？無論你住AirBnB定酒店，日本因爲地震防災關係，牆壁好少係石屎，多數係木材亦較薄，隔音差到你唔信。加上日本住宅區好靜，如果你開窗的話，隨時唔止隔離左右單位，隔離左右Apartment都聽到你講嘢。
而日本電車巴士車廂、商店、餐廳等地方，如果其他人都比較安靜，麻煩都自動自覺收細音量比較好。好多時候對於香港人普通的説話音量，喺日本已經係好大聲，何況係成班朋友去旅行興奮起上嚟大聲講大聲笑呢。仲有就係WhatsApp語音訊息，可免則免啦。小弟自問同大部分日本社畜一樣，返工放工嗰程電車就算無得坐低補眠，都想耳根清靜（然後企喺到都瞓得著）。
2. 切勿係唔係都影
我都好明白短裙學生妹、Kawaii小正太小蘿莉、和服美人、壽司師傅個個都好吸引，不過喺日本，好多人其實對於被偷拍好反感。如果對方係小孩或女性，對方直頭可以大叫「警察叔叔就是這個人！」。日本手機同相機之所以無得熄影相快門聲，正正就係防止偷拍。就算大家並非有心影人，都可以注意返影相嘅時候鏡頭有無令人覺得你影緊對方，從而令人反感。
另外，商店内就最好唔好影相喇。如果真係想影，向店員做個影相手勢，問一句「Photo OK？」，得到許可就你影得安心，店員又放心。請注意，香港人好喜愛蒲的Game Center，夾公仔機係唔俾拍攝㗎。
3. 唔好以為無人識聽廣東話
去到一個其他語言嘅地方，好自然講嘢都會放啲。小弟喺日本講粗口仲多過喺香港。不過，其實香港作爲個人去日本次數最多的城市，加上大量去日本留學、工作、居住的香港人廣東人澳門人，又點會無人識聽廣東話呢（仲要係旅遊區添）？
小弟見過無數次香港人大大聲批評店家商品食物、評論路人樣貌衣著，甚至喺餐廳大談昨晚性事。小弟每次被廣東話評頭品足時，都真心好有大叫我其實聽得明嘅衝動。其實就算日本人聽唔明廣東話，從熱情目光、豐富表情動作，都略知一二你講緊咩啦。
4. 請到指定地方吸煙
日本同香港唔同，好多地區係禁止火車頭的。如果想吸煙，就要去到指定地方。
- 指定吸煙地點，基本上你見到一大班人企定定集會式煲煙就係
- 餐廳的吸煙席
- 吸煙室，多數係大街上一個鋪位/商場機場内一間房，毒氣室式吸煙
5. 如有大型行李請盡量避免通勤電車
日本通勤電車有幾恐怖，香港人係好難想像得到。不過就算幾逼幾恐怖，每個社畜心入面只係懷住絕望心情只希望準時返工。如果呢個時候遇上大型行李，先唔講閣下伯母會受到幾多關懷，小弟都相信你要逼得入車廂係同參加奧運難度有得揮。
6. 行路請留意路面情況
小弟每次返香港，最唔習慣就係香港人行路習慣。急煞、U-Turn、切綫、一字排開、瘋狂撞袋…同朋友訴苦，朋友都係叫我自己小心、用個又硬又唔怕撞的手袋同對方撞過。當然呢個係香港人習慣，我返到香港只好好好保護自己，唔能夠大聲嗌唔好。
不過日本人其實有自己一套行路方法。基本上同安全駕駛一樣。行走方向好分明，大家只需要觀察大家行走方向，融入其中就可以。如果需要轉彎、掉頭，最好事前慢慢減速並慢慢往想去的方向移動，唔好突然轉方向，好容易撞倒人。日本人手袋並唔Prefer用作格鬥，盡量就注意唔好撞倒人/袋，如果真係撞到人/被撞到，都應該帶愧疚表情點頭講聲すみません（樹mi媽些）。一字排開慢駛會阻住地球轉就唔使解釋啦？
係呀，係好煩，甚至係好L煩。居住在日本的我，有時都覺得香港Free好多。不過，旅行，就算你唔打算融入當地生活，至少都應該入鄉隨俗守當地規矩。當然啦，常識呢啲嘢，就算你唔理，都唔會有警察拉你（除咗偷拍同隨街吸煙同嘈到有人報警），所以Topic咪叫「最好注意的N件事」，唔係「一定要守的N件事」。
其實應該仲有好多注意會比較好嘅事，不過小弟懶又見識少，就寫到呢度。其實大家只要旅行時唔好只顧住自己，花少少時間留意吓身邊日本人做緊咩（例如談話音量、點行、有無啤行你），都應該會sense到應該點做。
