【日本入境 海關】有去開日本嘅朋友都知，入境日本時，有兩張紙要填，分別係入境卡同海關申告書(黃色紙)。成功入境日本後，要帶同行李去海關檢查閘口交埋張申告書，先算係完成咗日本入境手續。兩個手續都排隊排到暈！不過日本方面準備實施簡化海關檢查手續，只需用手機+護照，就可以快速通過海關閘口！
撰文：C｜資料及圖片來源：日テレNEWS24
日本入境 海關檢查手續簡化
入境日本時，須進行嘅海關申告手續，以後可以用智能手機，經「電子申告閘口」自己過關喇！首先試行嘅係東京成田國際機場第3航廈，預定於4月15日起開始運行。
「電子申告閘口」用法
訪日外國人或日本國民，均可事前於手機app裡輸入資料，然後到機場內設置嘅專用機器，放上護照及手機上顯示嘅QR code讀入資料，就可以通過「電子申告閘口」完成日本入境手續。新嘅自助申告系統實行後，預計本來1人平均需時30～40秒嘅通關時間，可縮短至5～6秒。
日本6大機場明年3月前實施
日本方面預計於東京奧運會、殘奧會舉行前，即明年3月前於羽田機場、關西國際機場等6個機場導入新系統，方便訪日遊客。而一直沿用嘅紙張印刷版都會保留續用，兩種方法並存。