text：孖田｜photo：《旅かえる》遊戲截圖
旅行青蛙：唔刺激又冇互動 click中旅人心理
老老實實，遊戲本身冇甚麼勝負之分，青蛙仲好cool咁，粒聲唔出在家看書寫文甚至遠走高飛，忽然返咗嚟又會乖乖帶明信片同手信回家，其實冇乜點同主人互動，但就憑可愛畫風同明信片變化多吸引人，台灣代表有五月天阿信、S.H.E. Selina等都有玩，香港代表就有903 DJ麻利，佢仲喺電台節目教Do 姐玩旅行青蛙！遊戲玩法就唔再多講，不過中台兩岸的心理師都勁分析遊戲嘅好玩之處。唔講唔覺，用下心理分析就會發現，我哋都幾似青蛙仔㗎！
01｜體驗父母心：衰仔去咗邊？
網友稱呢款遊戲做佛系養蛙，因為養青蛙就好似提早做父母咁：阿蛙仔日日喺屋企咩，你又覺得佢hea，擔心佢掛住睇書、寫明信片搞咁耐，唔食麵包，一搞就幾個鐘；到你離開遊戲再入去，先發現佢唔聲唔聲出咗門，又唔講低幾時返，搞到人心掛掛，成日入去遊戲check 住。心諗：衰仔都講聲喺邊，send 兩張相嚟睇下肥咗定瘦咗吖！
嗚嗚，阿媽，我知你平時係咩心情喇！玩還玩，去關心下父母先啦喂！
02｜冇腳的浪遊人心態
冇錯，呢隻蛙仔根本就係冇腳嘅雀仔。平時喺屋企宅蛙一名，又唔同玩家互動，走咗去旅行又唔出聲，去邊去幾耐又唔知，只係收到佢嘅明信片，有蝴蝶、老鼠仔、蟹仔做朋友咁。係咪好似嗰個裸職去南美做backpacker 、去澳洲working holiday、去法國學整餅嘅friend 子，久唔久又post 下同新朋友仔的相呢？每個朋友圈中總有個咁嘅人，唔少浪遊人都覺得旅蛙有自己的影子呀！
03｜擊中孤獨的心靈
「男孩像你也像我百萬個不止 大路名字但奇特因子」，有心理學家甚至認為，呢隻青蛙根本就係涵蓋所有城市人的心理。與其話大家養青蛙，不如話係照鏡！青蛙仔似個需要被照顧的小朋友，人人自稱青蛙係自己個仔女，但其實就係填補情感空窗的缺口。
有指呢隻遊戲喺日本最受20-30代女性歡迎；我們都寂寞，反正養電子蛙，成本低，課金買三葉草都好平，有話題性又唔使check 住晒，夠方便忙碌嘅都市人。咪睇小寂寞嘅威力，英國政府早前就設立咗「孤獨大臣」嘅職位，幫助人紓解心靈空虛。我哋日忙夜忙，每日迫車返工、每晚默默返閨，長期做低頭族，又何嘗有同人交流？但望下隻青蛙仔，又瀟瀟灑灑咁去咗旅行，影咁多靚相，冇負擔話走就走，想點就點，唔係你同我嘅夢想咩？
一隻青蛙仔都夠膽去浪遊，反而我哋就驚呢驚路，諗落都幾可悲，不如鼓起勇氣起行啦喂！
04｜打和！人人都係贏家
同一般遊戲唔同，旅遊青蛙冇輸贏之分，雖然可以課金，但有耐性一樣可收集免費三葉草，暫時亦都未有所謂嘅大結局。喺遊戲入面，沒有打大佬的目標，也沒有既定「成功、勝負」的準則。有心理分析就指，大家唔需要為成功感而執著，所謂的「牽絆感」都可以得到滿足同幸福感。呢種慢慢得返嚟嘅情感，冇得同人比較，係咪更窩心先？
中國網絡傳聞青蛙出門幾日唔返，之後就見到被怪獸食咗，甚至收到被車壓扁成蛙乾的照片；又有傳遊戲開發商指不想做個玩唔完的遊戲，意味青蛙有結局。後來都被證實係流料，好在啫！蛙蛙要出入平安呀！
05｜永遠都估你唔到
旅蛙嘅另一個樂趣，在於永遠估唔到自己隻愛蛙會寄咩明信片返嚟、有冇識到新朋友（老鼠、蟹、蝴蝶等等）。買不同食物、道具、護身符，再加埋抽獎嘅禮物，都會出現喺唔同嘅明信片，組合多到買六合彩咁。就算係買一樣嘅道具，你同friend子隻蛙蛙都可能寄唔同明信片畀你。好似我哋人人都去日本，但人人都會有唔同嘅歷程同體驗，簡直係人生縮影呀！係咪好有哲理呢？
除咗之前提到嘅日本景點外，蛙蛙仲會同friend子去不知名嘅地方。例如被蝴蝶「的」住飛、去老鼠屋企探鼠家族、同雀仔傾偈等等。有咩秘景，就要睇玩家點組合道具了！一個冇得控制、冇既定方式嘅遊戲，就係咁捉晒大家心理大爆紅！
