圖片來源：新傳媒資料庫、Unsplash
1.日本街頭小食，忌邊行邊食
雖然唔係每間街頭小食都有規定，但問過一位日本朋友先知，原來日本人即使係街頭小食，都好少邊行邊食。
以吸煙為例，佢哋都唔會做「火車頭」，而係行去指定吸煙區。較多人嘅旅遊景點例如雷門，街道兩旁嘅小食雖然非常吸引，但大家都會企喺店舖門口食完，先繼續行。
有次我去食一間雪糕店，諗住買完就走，點知老闆衝出嚟叫停我，叫我企喺門口食完先離開。呢個習慣同香港剛好相反，好多店主都希望客人買完就急急腳離開，唔好阻住做生意。
2. 韓國人喜歡隨地吐痰
平時喺香港成日見啲阿叔喺公園吐痰，估唔到韓國呢種「吐痰文化」不論男女老幼都非常流行，尤其係接近深晚時間，可能好多人都飲完酒，比較容易痰上頸。我見過就連著西裝嘅年輕男士，吐痰技巧都非常純熟。除咗痰之外，仲特別多嘔吐物，大家去韓國時，夜晚真係要小心啲。
3. 美國高昂小費
去美國食飯最肉痛嘅就係畀小費，如果係比較正式嘅餐廳，都會建議最少畀全單費用嘅15%作為小費。以美國嘅高消費嚟講，隨時畀小費都冇咗一嚿水。
喺香港食飯找續時，可能會將全數硬幣作為小費。但喺美國就千祈唔可以畀硬幣，連街頭表演者都一定要畀紙幣，因為畀硬幣係一種視對方為乞丐嘅表現。
不過美國人似乎已經非常習慣畀小費，我見好多人連買杯咖啡都至少會畀US$1作為小費……恕我比較吝嗇，每次食飯，我畀小費時都非常肉赤……
