網民分享11件旅行才會明白的事：發現愛上獨遊/唔止食買玩

有網民於討論區上以「一人幾個去咗旅行先明嘅嘢」為題，分享自己在旅行中明白到的事，引來網民熱烈討論！

旅行才會明白的事｜01 去旅行變得好有禮貌

網民指：「去咗先知原來自己可以咁好禮貌，周圍同人講thank you」。

旅行才會明白的事｜02  發現生活原來好舒服

網民指：「原來離開吓原本生活係咁舒服」、「唔使對住平時嘢事真係好開心」。

旅行才會明白的事｜03 使錢好易 搵錢好難

網民指：「發覺使錢好容易，搵錢好難」、「一星期使一年儲嘅」、「發覺原來淨係使錢， 唔使搵錢真係好開心」等。

旅行才會明白的事｜04 發現有人可以分享先係最滿足

網民在獨遊的時候明白到原來有人可以分享，才是最滿足：「會發現原來自己唔係真正喜歡孤獨，有人同你分享先係自己最滿足嘅時刻」、「親身睇到啲好壯觀好靚嘅嘢想同人分享下，但影出嚟好似好平凡咁，要一齊親身睇到先會有同感」等。

旅行才會明白的事｜05 發現自己係鍾意一個人

亦有人發現獨遊的快樂：「一個人去旅行再加身邊都係外國人係最enjoy 嘅時候」、「一個人靜靜地享受人生，唔使咩都要有人跟住」、「平時圈子大一班人，去旅行自己一個多咗私人空間好爽，就算一個人去都有其他分享方式，例如IG，WhatsApp」 、「一個人見到麻麻地嘅景點走馬看花又得，鍾意睇嘅鋪頭慢慢花兩個鐘頭行又得，尋日行得太攰，今日想晏啲起身又得，唔需要顧慮同行嘅人，自己想點就點」等。

旅行才會明白的事｜06 原來自己都幾鍾意出街

亦有人了解到自己的另一面：「去咁旅行先知自己原來都唔係淨係中意踎喺屋企，喺香港冇咩動力出街，但旅行出街唔會厭」、「就算行咗成日夜晚好攰，返酒店休息陣都會想出去搵下嘢食」等。

旅行才會明白的事｜07 明白到可以食飯嘅朋友未必可以一齊旅行

好朋友不一定是好旅伴：「個fd平時無咩嘢，一去旅行啲公主病格出哂嚟」。

旅行才會明白的事｜08 原來有歐洲人英文差過自己

有網民發現自己英文其實不差：「唔係歐洲人就係講英文，葡萄牙人講葡文，法國人講法文，波蘭人講波蘭語」、「試過喺捷克有外國人叫我教佢英文」等。

旅行才會明白的事｜09 旅行唔單止食買玩

旅行不單止食買玩，只要多留意身邊的人和事，體驗就會更深：「食玩買期間都睇到當地嘅文化，只要多加留意，其實係會有好多唔同嘅體驗，嘗試唔好只係focus 喺達成食玩買目標而忽略過程，會發覺旅行係好有趣」、「前排自己一個人去台中行街，唔記得買轉插，去到間好舊好殘嘅鋪頭食麵，順手問下位煮麵姨姨邊到有電子產品賣，我諗緊做乜嘢又唔答我，我覺得奇奇怪怪，佢粒聲唔出就拎個充電畀我用。我畀錢個陣又問多佢一次，邊到有賣，佢話送畀我」。

旅行才會明白的事｜10 香港交通又方便又平

見識過其他地方後，發現香港都幾好：「香港夜景世界第一，交通又平又方便，簡單易明」、「香港嘢食都幾多選擇」等。

旅行才會明白的事｜11 同父母去旅行都幾特別

同父母去旅行都幾特別：「之前帶父母去日本，自己做咗廿幾年港孩，發覺兩老去到日本咩都唔識咁，樣樣嘢要教返佢哋嗰種感覺都幾特別」等。