旅行初心者與旅行老手的分別

01 | 喺機場瘋狂影相

回想起初期去旅行，就算係凌晨機，搭車去機場個心情都興奮到瞓唔到覺，又好驚青有交通意外發生，所以預早三個鐘到機場，仲好興奮咁周圍影相。相比起依家，臨到最後一刻先到機場……喺機場等上機時，已經連起飛牌嘅「打卡位」都懶得影相。

02 | 開始厭倦坐飛機

以前坐飛機覺得係旅程之一，好期待食飛機餐、喺飛機上面睇戲、感受一下落機時嘅耳鳴……但當去過幾次長途旅行，尤其坐過飛十幾個鐘嘅長途機，真係怕咗坐飛機。

去旅行係好開心，但坐飛機唔係，飛機餐已經唔再令人期待，一個唔好彩，附近有喊足全程嘅小朋友，或者前面係一個會拉後椅背放到最盡嘅乘客，我一心只會想快啲落機吃喝玩樂。

03 | 第一次去旅行同房瞓

仲記得同女朋友第一次去旅行，雖然已經拍咗拖半年，但瞓同一間酒店房真係幾尷尬。入房除完鞋放喺邊呢？啲污糟衫唔可以亂咁掉，生活好多習慣都會喺旅行時原形畢露。女仔除咗素顏樣會曝光，睡姿、鼻鼾、啱啱瞓醒時個睡眼樣，都會表露無遺。不過依家……已經唔會再注重呢啲嘢，返到酒店房將行李亂咁放、臨走嗰日先慢慢執、大便完個浴室好似毒氣室咁，但呢一切都會令兩個人嘅感情升溫。

04 | 唔敢亂食嘢

以前去到外國見到未食過嘅小食都一定會試，尤其係台灣，行一轉夜市有四個胃都搞唔掂。依家反而會留肚到晚餐食餐好嘅，再加上年紀大咗，消化得比較慢，真係想像唔到以前自己係咁樣一日食六餐，夜晚仲食到麻辣火鍋……

其實無論係第一次去旅行，定係已經去到冇晒新鮮感，每一次旅行，總會遇到啲值得記得一輩子嘅回憶，到十年後睇番照片，其實每次旅行對生命都會有所得著。