我就好鍾意陽光海灘、去睇音樂動漫嘢，佢就鍾意睇藝術嘢同埋瘋狂行街買嘢，所以有時真係都幾九唔搭八。
但最重要嘅係，雙方都會互相遷就 :)
mission 1：陪女朋友睇自己冇興趣嘅嘢，而不失霸氣
記得我哋有次日本旅行，大家喺傾緊想去邊嘅時候，都有唔同地方想去。
我：「你有咩地方想去？」
女朋友：「我想去睇下街頭藝術文化。」
「街頭藝術？」
女朋友見到我個樣好似唔想去咁。
「係呀……你唔想咩？定係你有其他地方想去？」
「冇所謂呀～不過填飽肚仔先啦！哈哈！」
我見到女朋友好似真係幾有興趣，所以都唔想令佢失望，
雖然……本身自己真係興趣不大。
「隔籬嗰嚿嘢好搞笑呀⋯⋯」
「哈哈，咁當然啦！」
到咗女朋友想去嘅地方，見到佢不斷去睇同影相。
我：「其實呢個咩嚟呀？」
女朋友：「好似係佢哋好多年嘅文化雕像，之前想睇好耐喇～」
「你睇你睇～隔籬嗰嚿嘢好搞笑呀！」
「哈哈，又係喎！個樣好似你呀！！」
「………………. 咁你一定係隔籬嗰個。」
我指住另一個仲醜樣嘅畀佢睇。
「食屎！！」
mission 2：帶女朋友去睇動漫公仔，而唔會悶親佢？
而陪完女朋友去之後，就繼續輕輕鬆鬆喺條街度 hea 下，都真係幾舒服～
就喺轉角位，見到一間賣日本動漫公仔嘅舖頭。
「喂喂～～不如入去睇下。」
女朋友望一望間舖，個樣就好似嗰陣嘅我一樣。
「冇所謂呀～入去望下囉～」
見到一大堆動漫公仔，火影、鋼煉、海賊王等等，
或者女朋友真係唔知乜嚟。
「呢隻嘢好醜呀！」
「你識咩吖！幾型呀！！」
「喂喂～呢個係咪你成日講嘅咩鋼煉？」
「係呀！我要將你煉成人造人！！！呀～～～～」
跟住我將隻手捉住佢個頭。
「收皮啦！我冇整容囉！」
雖然有時話就話陪對方去，但其實都會不知不覺間融入對方嘅興趣:)
相信唔單止去旅行，可能喺香港陪對方買衫、行街，甚至係睇一啲自己完全冇興趣嘅嘢，但你都會好樂意咁陪對方。
因為你最大嘅興趣，就係你嘅另一半。:)
#旅行 #對你的興趣 #也有興趣
個人動態:) Ig： hottofuzai
https://www.instagram.com/hottofuzai/
更多文章 fb： 熱豆腐仔
https://www.facebook.com/hothottofu/
歡迎加個人AC:)
Ho ToFu
https://www.facebook.com/hottofuzai
下一頁：我懷疑女朋友收埋一塊月亮咁大嘅面，如果唔係點會買咁多化妝護膚品……