話晒都係香港人，飛日本返鄉下真係最開心！一來食好住好，落機之後仲可以瘋狂血拼；二來日本乘客通常都好靜好乖，有禮貌唔多要求（或者係唔好意思出聲要求），對非日籍空姐空少嚟講，真係好易服侍。最特別就要數，當中有一機人「快閃日本」令我大開眼界……
撰文：業餘空少飛Sun | 圖片：新傳媒資料庫、電影劇照
快閃日本大媽大叔團
話說公司有一班機係經台北去名古屋，早機去晚機返。雖然經台北轉機時要做多一次上客落客，但係由於停留時間有成足足 24 小時，夠晒成班港男港女買晒成個日本返香港，所以呢個 pattern 喺同事之間都係非常受歡迎。但係唔講唔知，呢個pattern除咗受我哋成班同事歡迎之外，仲好受一班台灣叔叔阿姨歡迎。
「喂霞姨乜咁啱呀，又係你呀！」
當時仲好新好 green 嘅時候試過做呢班機，台北上客時已經留意到有好多上咗年紀嘅叔叔同阿姨上機，睇佢哋一個二個都輕裝上路，行李櫃基本上都冇乜手提喼，心諗唔通全部都寄晒艙？
好啦，到第二日回程喺名古屋上客嘅時候，又係一大班上咗年紀嘅叔叔同阿姨。咪住先！好似有啲熟口熟面，睇真啲直情係同昨日一樣嘅嗰班客人添喎！有幾個連衫都冇換添呀！
仲有個伯伯笑騎騎咁同我講：「又見面了！」
唉！點解會咁嘅？？？？
唔通我好似《死亡無限Loop》套戲一樣，穿越咗返去昨日？咁我點算呀？係咪要拍《乘客無限Loop》？
原來全團人快閃日本係為……
事有蹊蹺，即刻返入 galley 同阿姐彙報先。點知阿姐擺出一副「少年，你真的太年輕」嘅表情，
佢話：「係呀，呢班機成日都載啲團去打胎盤素針㗎！」
咁啱其中一團個領隊就喺 galley 問緊阿姐有冇興趣都 join下呢個團。咁老實講，阿姐都好似有啲需要……我都係返出去招呼客人先，唔好阻人發達。
知道發生緊咩事之後，我即刻識趣同嗰班無限loop嘅客人打招呼：「你今天氣色真好喔～」
下一頁：2018日本福袋攻略 | 記者教路 | 3招免做羊牯
