復活節本地遊｜觀塘旅人市集 30+ 熱愛旅遊檔主齊集擺攤

今個復活節即使冇外遊計劃，亦可以有去咗旅行嘅感覺！因為首個以旅遊為主題的旅人市集，將會在復活節期間舉行，由1位前旅遊記者主辦，這次搵來 30+ 個熱愛旅行的檔主，結集他們從世界各地帶回來的新舊好貨，或者由外地學習回來的手藝一次過呈現，加上多個旅遊分享會，以下精選了幾位當日會在市集擺攤的旅人故事！

text： Sammi

01 ｜法國瓹窿瓹罅搜羅貼心旅遊好貨

5年前Zeno走到法國留學，曾為旅遊記者的她，性格爽直開朗，鍾意周遊列國發掘當地文化故事，幾年來從英法等地市集，認識了不少有心的年輕設計師，索性將他們的產品集合起來，放在網店售賣。她特別喜愛有旅遊故事的產品，例如1位插畫師出品的地圖，推介巴黎、倫敦等地的心水旅遊路線。「比起大路旅遊地圖，更加貼近我們的旅遊需要，唔使上網research，就搵到當地人的心水小店。」講到最貼心的旅遊隨身物品，Zeno就推介1本細小的口袋尺寸翻譯本。「最初去歐洲旅行，好怕去餐廳食飯，因為餐牌盡是法文、意大利文同西班牙文，好難明白，但係呢本簿仔有齊餐牌上最常見的食物名翻譯，真係好方便！」

Zeno / Joyeuserie檔主

曾於法國留學，現時法國香港兩邊走，除了開設網店，還同時兼顧翻譯、記者等工作。喜歡到歐洲各國行市集，不斷搜集有意思的設計品牌，與當地設計師、店主交流旅遊故事。

02 ｜印度民族風雜貨義助當地學童

Wish You Were Here檔主小明，3年前揹住背包上路gap year，先去西藏及尼泊爾逗留了3個月，再走到越南、柬埔寨、老撾、泰國、緬甸及印度，8個月行程的最後1站，她到了印度的菩提迦耶（Bodhgaya），在1間名為A Bowl Of Compassion的小學留宿後，自此改變了她的生活態度。

「記得頭兩星期，每朝早都有小學生在窗外掀開窗簾，偷望我瞓覺，呢班小朋友好純真可愛，日日陪佢哋玩，幫忙照顧小童。」這間小學專門為當地的貧苦小童提供讀書機會，學校將一部分劃為民宿，幫補收入同時招募世界各地的義工義教小童。「見識過印度的貧富懸殊，我覺得教育是唯一的出路。」返港後兩年，小明因懷了小孩，曾到家人公司負責文書工作。「總覺得不適合自己的性格，我就是天生坐唔定。」小孩「腰仔」出世後，小明沒有繼續上班，曾回印度探望小童，直至上年11月決定開設網店。「背包行的1年，識咗好多世界各地嘅朋友，就靠他們幫忙入貨，搜集印度、尼泊爾、哥倫比亞等地的傳統民族服及飾物。」

小明 / Wish You Were Here檔主

大學社工系畢業之後，斷斷續續出走近1年，試過在香港出發，經大陸搭巴士去越南、柬埔寨及老撾等地。去完印度菩提迦耶入住1間小學民宿之後，決心開設網店售賣各國傳統手工藝品，賺錢助學印度小童。