騁馳旅遊業界多年，杜遊珍不時遇上猥瑣怪，一聽見旅遊記者帶 Model 出 Trip 就充滿遐想，涎著臉說「哇，咁咪……好筍？」其實這欄目都唔係第一次揭露帶著 國產嫩模 出差的辛酸，不過騎呢事情總是推陳出新，今期又要是非當人情，用冷水淋醒亂諗嘢的大叔！
01) 強國公主搶佔市場
由於近年港女模特兒愈來愈甩皮甩骨、生硬甫士教極唔識轉彎，不少 Agency 都轉向大中華發掘嫩模，通常又真係比較養眼兼活潑，只不過當中也不乏陷阱，原來不少國產嫩模都傾向隱瞞自己強國出生的身世，難為記者不知內情，花上一輪工夫安排出差到台灣，到臨門一腳，對方才懶洋洋表示自己大陸出世，又未去過台灣，不能落地簽證，立即申辦也要等足 10 至 15 個工作天，個 Trip 去唔成，真係令人頭痛！
02) 業界新暗號：「佢呢排，靚咗喎！」
作為以臉口搵食的行業，嫩模為了增值不惜改名換姓、修葺五官、僭建身型都已經係公開秘密，杜遊珍聽行家朋友講，近年去韓國採訪記者特別容易 Cast 到 Model，因為對方都貪其可以因利乘便，趁回程前爭取一日半日來趟微整型！記者C同阿珍講起，近來選模特兒的時候，Agency 都會作出溫馨提示：「佢呢排，靚咗喎！」但到底變咗喺邊處，身材好咗、棚牙哨咗、定係塊面V咗？對方又好隱晦不肯明言，好似猜謎一樣！
03) 天生大話王 失禮無國界
十個有九個嫩模都美貌與智慧不相稱，杜遊珍曾在飯局中親耳聽到公關問記者D：「How’s the food？」嫩模叻唔切的搶答：「呢度所有嘢都好難食，佢哋都覺㗎！」諉過於人兼夾老屈，記者D及攝影師立即呆晒！帶著國產嫩模歐遊，對方卻日日嚷著要吃中餐，有次趕路上山，對方誇張到要買碗湯麵邊行邊食，遭拒絕後立即黑面跟其他行家說「無得食嘢」，擘大眼講大話，真係戥記者朋友們辛酸！
