帶長輩去旅行 | Travel 定 Trouble？

佢想觀光，但我想行街……

很多人都想 帶長輩去旅行 ，就是想帶他們見識世界、試新嘢、食好嘢……不過你諗所謂的好，父母又未必鍾意，所以第一點要記住，在出發之前，最緊要同長輩有共識。如果他們想觀光睇風景，但你卻是一心想帶他們行街掃平貨，隨時變「旅行災難」！有時間更可以同長輩商量行程，或者預早把行程告訴他們，先至可以避免旅程不開心。

去天台酒吧，但媽咪畏高！

面對一班親戚，即使旅遊達人，都有失手之時，泰國通胡慧冲就試過。「上年媽咪帶埋親戚來泰國，一心帶佢哋去最新的商場行街，但佢就話香港都買得到；去靚景天台酒吧就畏高，搞到我勁冇癮。不過去到最尾，媽咪話只係想見下我，同我食餐飯就滿足。所以計劃行程之前，先了解長輩的心意和喜好先至係最緊要！」

去到邊都要食中餐

其實父母出國旅遊，可以同班子子孫孫相處，已經好滿足。記住以下兩點，就包保整個行程開開心心，唔使被阿媽呻爆。第一，行程切忌太緊密。雖然好想帶長輩見識多啲，但人老腳仔軟，預多些休息時間；第二，每日都至少有一餐食中菜，或者「有米氣」食飯。如果去亞洲國家都易解決，但去歐洲餐餐牛肉、漢堡、意粉，阿爸一定黑面。名廚Jacky Yu都試過旅行帶長輩食貴價米芝蓮，但最後教訓卻是唔好搞太多花臣，有飯有菜父母就唔扭計。

去旅行，邊個畀錢先？

同父母去旅行，都係想盡孝心，好多時都是由一班年輕的後輩出錢。藝人河國榮說：「一家人冇計，即使邊個出錢都冇所謂啦！不過我的父母已經退休，所以我們每次旅行，多數由我呢個做仔嘅畀。除了錢銀問題，大家安排行程嗰陣，千祈唔好太緊密，上次佢哋來香港探我，就係因為我貪心安排好多行程，反而令佢哋好攰。」

資料來源：由《新假期》主辦的「第16屆最佳旅行社選舉」公布結果，同時公布於2016年11月17日至12月4日期間進行「帶着長輩去旅行」 問卷調查結果。