相信好多人都患上咗「不去旅行會死症」，每年都至少要離開一下香港，去其他國家「複診」一次，充一充電。嘩大佬，返工咁辛苦，梗係要慰勞一下自己啦！但有冇諗過，你屋企嘅父母辛苦咗幾十年，可能佢哋一次旅行都未去過？而你又會不會和父母去旅行？
圖：明星微博
旅伴清單裡從來沒有「父母」這個選項
前排同朋友傾開呢個話題，發現原來好多人都未帶過父母去旅行，但相反自己就經常去。我並唔係指責幾位朋友不孝，因為佢哋每個月家用畀足，生日、過節一定返去陪屋企人，而係佢哋完全冇諗過一齊去旅行嘅選項有「父母」……
辛苦多年 只參加過大陸旅行團
其實我第一次帶屋企人去旅行，都係因為某次食飯時，電視播緊旅遊節目，我問佢哋以前後生去過邊度旅行，想知以前同而家嘅旅行方式有咩分別，點知父母話剩係跟團返過大陸……
因為結婚冇耐我就出世，要返工又要照顧我，根本冇時間去旅行。會唔會覺得唔抵？唔會㗎！因為父母根本冇得揀……所以，自從嗰次之後，我每年都會強迫綁架父母去一次旅行。起初佢哋好抗拒，覺得浪費錢又麻煩。但去完一次，佢哋都完全上癮了！
帶父母出走 開心變「大細路」
旅行初心者，第一次帶咗父母去台北。佢哋一落機就對所有事物都好好奇，變番成個大細路咁。阿媽仲話手機終於可以影多啲相留念，以前每日都喺屋企，手機幾乎冇影過相。當然，帶父母去旅行係好辛苦嘅，一個對食物極講究，一個對價錢勁敏感，去邊都唔捨得用錢。
「不去旅行會死症」會傳染，看到彼此笑臉已值回票價
返到香港當晚，阿媽已經問我下次帶佢去邊度玩，仲自己識得上網搜集行程，叫我記得下次帶佢去。而老竇自從去完一次台北，竟然同班同事一齊組團去自由行，佢話其實公司每年都會有類似活動，只係以前佢冇參加，但依家聽見有得去旅行就即時舉手。
睇嚟，我已經成功傳染咗「不去旅行會死症」畀父母。有時做子女，冇辦法想像到以前父母為生活係幾咁辛苦，因為佢哋永遠唔會喺你面前呻，父母見到你開心就足夠。同樣地，我見到佢哋兩個咁開心，就算幾辛苦都值回票價。
