最近同大班朋友旅行，其中一個朋友，自殺式帶埋佢兩個仔去旅行，一個 8 歲一個 14 歲。
我哋都忍唔住問佢：「點解咁睇唔開啊？搵屋企人照顧住佢咪得囉！你個細仔邊識得去旅行啫～佢大個都唔記得晒啦！」
我朋友話：「佢記唔記得呢次旅行唔重要，最重要係我記得。」
帶小朋友去旅行 是麻煩還是製造美好回憶？
喺各位心目中，帶小朋友去旅行係咩一回事？搭飛機起飛時喊，中途扭眼瞓，落機耳鳴再喊；旅程太早唔願起身，太夜扭眼瞓……
總之帶小朋友去旅行就係麻煩一堆！不過……今次同朋友一家人去完呢次旅行，令我徹底改變咗呢個觀念。
雖然小朋友的確係難照顧啲，食飯未必樣樣啱佢食，夜晚行程亦唔太方便，仲需要抱住佢行街。個大仔正值青春期，見佢全程都攞住手機，好少同人講嘢。
旅行製造共同話題 增加互動
但去到某日行程，我哋去到歷史博物館，細仔竟然好認真咁睇每一樣文物，睇唔明就問阿哥。阿哥為咗解釋畀細佬聽，睇得非常認真。
坐火車回程時，阿哥仲不停查維基百科，睇下呢個國王到底係點死，臨死前又點解要興建個咁大嘅皇宮，對現今有咩影響……
老老實實，我未試過行一個博物館行足半日，以前多數只係「純粹參與過」就算數，就算去法國羅浮宮，成千幅畫都係走馬看花，去到「蒙羅麗莎的微笑」都只係微笑影張相，冇太深究歷史。
回想起以前中學，世界歷史課一大堆陌生嘅「人名」同「年份」、「乜乜乜事件」，每次考試我都肥佬，覺得離自己太遠，腦海根本塑造唔到個畫面。
但今次多得呢兩兄弟，原來歷史真係可以當故事咁聽，當我哋參觀某國王嘅皇宮，見到國王嘅畫照，了解佢日常生活，再睇番歷史就容易塑造個關係圖好多。
完結整個旅程，朋友要照顧兩個仔的確好辛苦，但見到大仔寧願同父母傾偈都唔玩手機，細仔開心到話大個要請番父母去旅行，一家人開開心心。
Tags :
旅遊態度
