去到外國，有好多景點，尤其係參觀古蹟、皇宮、城堡、古代監獄，為咗更容易令遊客了解景點歷史，都需要遊客參加導賞團。
大多數導賞團都會由一位導遊帶十多名遊客，作用係更有效管理參觀者，同時參觀每個地方都會用心解釋各處歷史故事。
香港人嘅旅遊特質，就係好鍾意影相！
先講我個人覺得導賞團嘅優點，有一次去法國參觀皇宮，導遊對住塊天花板壁畫講解咗十幾分鐘，雖然係好悶好冗長，我又唔太熟悉歷史，但都引起我之後上網查閱嘅興趣。我成日都諗，如果我學生時代有機會嚟呢種地方，可能我對歷史會感到興趣，更加留心聽書。
但我發現自己都擁有好多香港人有嘅旅遊特質，就係去任何景點都好鍾意影相！話說有一次參觀古代監獄，我興致勃勃卯足勁咁聽導遊講故事，但當我經過牢房同刑具時，我……我真係……
好想影相！但導遊講解完之後，就一支箭走咗去，其他外國遊客亦冇打算影相嘅衝動，我只好跟隨大隊離開。
台灣司機：「香港人一上到車就瞓覺……」
最深刻嘅一次導賞團，係上陽明山睇日出，未天光就要由民宿坐一架七人車上山，同行仲有另一對香港情侶，上車冇幾耐，司機就同我哋講咗句：「我一看就知你們是香港人！」
我問司機點解會知，佢話：「因為你們很安靜，都不跟我聊天……」原來，好多唔同國籍嘅遊客都會上車後同導遊傾偈。司機仲即場示範好多國家語言畀我哋知，但佢話每次香港人一上到車就係瞓覺……
結果，我就陪咗司機傾足全程，而後座嘅情侶繼續瞓覺，但其實我真係好眼瞓，好想靜靜瞓一覺……
不過值得一講嘅，係外國有好多有關自然保育嘅導賞團，導遊會以唔騷擾到動物生活嘅情況下，講解自然動物生態，令我哋學識好好保護佢哋。諗深一層，香港真係冇乜類似嘅導賞團，亦因為呢個原因，所以唔太習慣參加其他國家嘅導賞團。
