行李損毀令乘客損失慘重
結果，落機攞行李時，發現成個行李箱爆開咗！
就算大家好彩未遇過類似事件，都一定睇過唔少相關新聞。巴西音樂家赫佐克（Myrna Herzog）將價值連城嘅十七世紀古提琴託運，結果發現古提琴嚴重損毀，碎開半邊慘死。
錢財損失可追討賠償 但寵物的生命卻不能
你以為用貴價少少嘅行李箱就冇事咩？咁就大錯特錯了！
有位做航空公司負責搬運行李嘅朋友所講，香港機場實在太多飛機升降，根本趕唔切運送，佢哋成日因為運送太慢被投訴，個個都做到躁底，於是行李好似拋鉛球咁亂飛。
但朋友稱，行李箱損毀嘅元兇，係因為香港人購物能力太強，好多行李箱根本嚴重超重，運送時，堆疊上去好容易爆開。
不過行李損毀只算係錢財損失，亦可以向航空公司追討賠償（雖然賠償金額未必合理）。
但係，當你想帶寵物搭飛機，將一條生命交託畀航空公司，佢哋又會否「當係一條生命」咁去處理呢？
航空職員知識不足 接連發生多宗寵物託運事故
一般人大多對飛機認識唔深，我哋相信空姐、空少有專業知識，所以上到飛機，有好多規則都只好乖乖遵守。
但最近出現嘅新聞，都證明航空公司人員唔單止冇當寵物係一條生命，仲冇乜常識……
例如美國21歲女學生上年11月帶咗隻寵物倉鼠坐飛機，出發前兩次致電航空公司，職員向佢確認可以帶倉鼠上機。
但到達機場後，航空公司又拒絕畀佢攜帶倉鼠，職員仲建議佢將倉鼠掉入馬桶沖走，結果佢忍痛照做，令倉鼠死去……
有單新聞仲誇張，一家人帶住狗狗搭乘聯合航空，本來主人準備咗符合尺寸的狗袋，想將狗狗放座位底下，但空中服務員要求將狗狗放入頭頂行李櫃中，並承諾唔會有任何危險。
結果四小時飛行旅途後，發現狗狗缺氧死亡。
https://twitter.com/abfabincali/status/973673413251248128
道歉無補於事 航空公司應加強相關培訓
好多主人都視寵物為兒女，諗住航空公司會尊重生命，亦有專業知識先相信佢哋嘅說話，結果每年都不斷有寵物因安排失誤而喪命嘅新聞出現……
可能有人會話：「寵物學咩人坐飛機！預咗有風險啦！」
但寵物同為生命，航空公司會確保乘客安全，對待寵物卻差天共地，意外發生冇得好講，不過放入行李櫃同沖落廁所，點睇都唔符合常識。
每次出事，航空公司都只會為事件道歉同賠償，但……道歉同賠償有鬼用咩，狗狗冇可能復活。
不如諗下點樣教導工作人員有關知識，避免同類事情再發生好過啦！
