【富士山麓 樽熟原酒50°】繼「白州12年」、「響17年」之後，又一人氣威士忌宣布停售！由KIRIN麒麟出產嘅調和式威士忌，帶有淡淡麥香嘅「富士山麓 樽熟原酒50°」，宣布於明年春天停售。日本國產威士忌，似乎真係買少見少喇⋯⋯
撰文：C｜圖片：KIRIN
「富士山麓 樽熟原酒50°」明年停售
麒麟啤酒今日（11月28日）宣布，由於原酒不足，主力威士忌產品「富士山麓 樽熟原酒50°」，將於明年春天3月下旬左右停售。日本國內大型酒類生產商，朝日啤酒，於數年前停售標示熟成年份嘅商品「余市」、「宮城峽」，今年則有Suntory嘅「白州12年」、「響17年」宣布停售，可見日本國產原酒不足嘅影響愈來愈明顯。
於2016年3月開售嘅「富士山麓 樽熟原酒50°」，佔麒麟啤酒威士忌類商品總收入約3成，係主力產品之一。日本國內市價約1,700円（約HK$119），於國產威士忌產品中屬於中價格帶。隨住日本盛行飲highball，國產威士忌供不應求，因為無法確保能安定供貨，所以決定終止發售。
另一方面，今年8月發售嘅「富士山麓 Signature Blend」（連稅價格5,400円/約HK$378）則不受影響。
由於年代較久嘅原酒量愈來愈少，生產日本國產威士忌嘅啤酒公司，比起中、低價格嘅產品，更偏向生產高價格帶嘅產品，亦在增強熟成用木酒桶嘅儲藏設備等生產工具。
