撰文：CY｜圖片來源：事主圖片、港島海逸君綽酒店、facebook截圖
情人節Staycation嫌酒店人手不足 20名住客圍堵前台要求全額退款 網民：超負荷收客同欺詐有咩分別
住客難忍「冇服務」圍堵前台要求退款
有網民於facebook群組中發文，指自己入住港島海逸君綽酒店當日遇正情人節客潮，怨爆 check-in 已經要排2個半鐘，其後利用住宿套票包括的餐飲消費額於房內點餐，等逾6小時卻仍然未有得食，接續前往大堂查詢，才發現逾20名有同樣遭遇的住客們正圍堵前台，要求職員辦理退房及退款手續。
半夜仍未有晚餐 酒店建議用消費額買走汽水
有當日入住住客證實事主經歷所言非虛，指酒店曾承諾「9點半送到，等到10點未見」、「10點半落去lobby搵經理，全部都係答『整緊，未知幾時有』」，其間酒店只允許免費使用mini-bar「頂住肚先」，直到近11時45分才送咗2盒炒飯給她了事。事主亦回應指，當時酒店曾建議她使用餐飲消費額：「叫我$1,400買走啲汽水。」直斥「根本就係欺騙」！
住客：經理匿藏辦公室拒絕回應
該住客強調：「我哋個package係包咗dining credit，冇dining service提供到，退款係最基本。」因而向酒店提出要求退房及全額退款。有另一在場住客透露當時：「個manager好好笑，全程匿喺後面office又唔出嚟回應。」令事件進展一度膠著。其後有住客接獲酒店電郵回覆指可獲全數退款，至於賠償待覆。
網民狂鬧酒店：超負荷收客同欺詐有咩分別
網民得悉事件後態度兩極。有網民認同事主立場，認為酒店管理混亂，「明明畀錢去享受點知受苦，呢間嘢睇嚟太混亂了」、「超負荷收客同欺詐有咩分別」、「你明知接唔到咁多客就咪_充大頭喇」、「如果自己嘅manpower冇能力應付full house嘅客而照賣房，客人投訴都好合理」。
反對網民：你哋班人去得就預咗多人啦！
不過，有網民則認為事主及當日其他住客小事化大，斥責他們入住酒店經驗不足。「其實去全世界嘅酒店住，想入住當日到佢哋餐廳食嘢，係必須自己預先訂枱嘅。」又有不少網民表示：「情人節就預咗啦！周圍都係咁啦！」「你哋班人去得就預咗多人啦！」不應該將酒店問題放大審視。
GOtrip編輯部嘗試向酒店了解事件，惟酒店暫時未有作出回應。
