每日無論係返工定係放假，起碼都有粒幾鐘係喺交通工具入面。尤其係去日本同韓國旅行，冬天嘅時候，巴士同地鐵張櫈有埋暖氣……嘩！舒服到呢～所以一上車，女朋友就會秒速瞓覺……
情侶依偎睡覺的最佳姿勢
兩個人點先瞓得舒服，又唔會頸骨痛呢？姿勢方面我研究咗好多，最後得出結論係女朋友挨落我膊頭，我再挨落女朋友個頭上面！佢個頭細細隻咁，高度啱啱好！
不過有時瞓得太舒服，個人就越滑越低，我同佢兩個人就好似升降機一樣，挺番直個身，又再滑低……
去旅行搭車不敢熟睡 負責叫醒女朋友
平時喺香港搭車可以瞓得好安樂，但去旅行我就有個重大嘅任務！
就係留意住幾時落車……
「落車叫醒我啊！」女朋友臨瞓前叮囑我。
「但……但係我都好眼瞓喎。」
「你可以瞓啊，不過識落車就得！」女朋友講完之後就安然地進入夢鄉。
喺香港，我大約知道會搭幾耐，又聽得明站名識起身。但係去旅行就慘喇！無論係搭巴士定地鐵，佢廣播個站名出嚟我都唔識聽。
如果大家搭過日本某啲長途巴士都知道，個司機會由上車一直講嘢講到落車，去到咩站亦係由司機用口講出嚟，所以我想睇下巴士站嘅站名都唔得。
但我見女朋友瞓到隻豬咁我又唔抵得，我只好照樣休息，每當感覺到架車停低，我就擘大眼戰戰兢兢睇下到站未……
我望一望女朋友，佢瞓到流晒口水，就知道佢非常信任交俾我，瞓到100%熟睡。
落車時，佢就精神飽滿，我就神經緊繃，繼續當天嘅旅程……
專屬膊頭 一輩子都戒不掉
仲記得第1次女朋友挨落我膊頭，係喺巴士上層。我緊張到腰背挺直全身僵硬，我諗佢都唔會瞓得着。
第1次攬實佢，係因為港鐵太多人，所以「順手」攬住佢，以免佢被色狼所害。佢話覺得好有安全感，我只係覺得佢嘅頭髮好香。
時間耐咗，兩個人一互相挨住，就秒速瞓到成隻豬咁……
我發現，挨慣咗呢個「私家專屬不設外借黃金膊頭」，就一世都冇可能戒得甩。
