港男撻綠卡朵狠批國泰唔upgrade好垃圾
早前一名網民於一個Facebook群組內發文，甫開頭就狠批國泰「真係好垃圾」。他指自己當日乘搭從台北返回香港的國泰航班，在買機票時他所購買的是經濟艙座位。 而在上機時他卻見到商務艙「勁多空位」，不過就算是地勤抑或是空姐們都沒有為任何人upgrade，他就在文內晒出自己的國泰航空馬可孛羅會（Marco Polo）綠卡身份，並用頗為不滿的口氣指出：
都唔upgrade吓會員坐，好浪費！
利申：有Marco Polo綠卡
網民集體恥笑：我金卡都未出聲，綠卡躝開啲啦！
原以為可以圍爐取暖的他，卻被一眾網民集體恥笑！有人表示事主表面是想批評航空公司安排，實際是「公告天下」貪小便宜失敗「又要小貪便宜又要威，仲要取暖」、「如果坐商務見到你，國泰先叫垃圾」。
【綠卡係人都申請得啦！】「CX 綠咭，有人形，有手有腳已申請到㗎喎！咪玩啦師傅！」
【我金卡都未出聲啦！】「X那星，綠卡仲夠膽學人呱呱嘈！我做咗8年金卡都冇得要人一定upgrade俾我啦，發神經！」
【嬲咗！駕駛艙有位都無俾我坐】「國泰真係好垃圾，明明飛機駕駛艙有位，都唔叫我入去坐，好浪費！」
【匯豐印銀紙都無派俾我，垃圾！】「匯豐真係好衰，自己都印銀紙，都唔派啲俾我！利申：HSBC staff」
【喂明明就係白卡】「青山咁多位，都唔派白卡俾佢！真係無天理…」
醒目網民懷疑投稿實為膠post
不過這位發帖人的發帖原意就被部分網民質疑，指他曾經在群組內發多個「膠post」吸引注意，例如問網民「去旅行撞爆咗個mon貼有冇得claim？」及「去旅行前被髮型師剪衰個頭仲去唔去好？」，所以被部分網民懷疑此post實為膠post / 潮文，不少人都笑言「零分重作」、「派膠唔該去硬膠谷」。
