01 | 收買人心 宿舍玩國粹輸俾同學仔
去留學，同學仔最怕宿舍新朋友難相處，農夫在節目中懶醒畀貼士，就話一定要作「深層次文化交流」，搞爛gags教廣東話已屬低手表現，識玩一定係玩國粹打麻將。「麻將邊打邊吹水，打賭贏咗可以叫佢做你手下，好化算。」點知外國朋友仔鬼咁醒目一點就明，即使農夫聚精會神，陸永仲心思思想出蠱惑，可惜都係一句「食糊」慘被KO。不過氣氛超融洽，監製都讚農夫搭訕係有一手，值得學習！
02 | 體育挑機 C君慘變趴街
今次去的Mount Kelly College是英國出名的運動名校，農夫去到第一時間當然要同學生作身體交流，出馬前兩條友仔勁得戚表示：「我哋兩個牛高馬大，佢哋成班中學雞，點會輸喎？」可惜事與願違！陸永挑戰傳統運動板球，以為手長腳長一定接到波，點知快到連波尾都見唔到，嚇到佢以為對方練成「童夢幻影球」；C君話自己下盤結實，走去玩rugby，可惜tackle練習目標時已慘變趴街，真係陰功豬！在場監製都睇唔過眼話：「哇！你兩個玩一陣已經瘦咗一圈喎！」諗住完？你就想！之後仲要游水划艇玩帆船，兩個人慘被地獄式訓練，陸永最後忍唔住話：「嚟留學，麻煩操弗個body先！」
03 | 泥漿步行 老漢推車鬼食泥
英國特種兵傳統訓練要跑泥漿（Tough Mudder），學校竟然有類似體驗，一場去到，農夫自然再「中伏」，換上尷尬緊身衣後，即跟大隊上場。陸永行兩步已心知不妙，話好似有10個羅莽師傅捉實佢；C君更再次趴街，教練出動都要成5分鐘先成功解救，同學仔話原來早前落過雨，泥漿軟化勁難行！
同學仔個個都無懼即跳，農夫就睇到面青青！
之後仲要玩「泥上老漢推車」，陸永醒目即舉手話要做「老漢」，C君扮車時慘叫：「玩嘢咩！我咁重手又短，行嗰陣啲泥高過我個鼻，今鋪真係鬼食泥呀！」最後仲大鑊，竟然係跳崖，監製見到成層樓咁高嘅山崖已叫停，點知兩個人心口有個勇字，竟然一躍而下，事後邊手震邊話：「我哋香港過嚟，唔可以衰畀外國小朋友睇！」監製，麻煩頒個獎畀佢哋！掌聲！
04 | 軍服野戰 血腥求生嚇到面青青
陸永最欣賞外國教育課程，在於佢哋唔止學書本上的知識，而係會教求生技能，好似野外定向堂就係一個例子！當日晨咁早天未光就著好軍服集合，同學仔個個都有板有眼，陸永話自己似「劉大衛」，C君更話自己係天生軍人，因為佢本名係「鄭斯君……人」喎！不過我睇極都覺得佢兩個只係似兵仔囉！
睇表情已知，佢哋兩個嗰一刻真係好驚呀！
在勁陰森又方圓百里無人的草原行成幾個鐘後，終於見到目的地，教練竟然即刻教大家「處理」野兔，畫面血腥，睇到佢哋兩個差啲反白眼，但在場其他同學非常氣定神閒，事後問番先知，「野兔在當時情況只係食物，冇得驚！」由細開始接受訓練，果然零舍不同，有膽識！
05 | 蒙眼畫畫 鬥氣玩決裂
Mount Kelly College注意多元發展，上堂出名有創意，估唔到美術堂都有新花臣，竟然係蒙眼畫畫鍛鍊團隊精神。陸永C君話晒都組團農夫超過15年，當然未驚過，C君蒙眼後，陸永即刻開始，可惜搞笑癮發作，當然亂噏當秘笈。「哇！你畫得好好呀！隻貓畫到好似狗咁，隔籬仲有個花樽，點解你畫到寶礦力咁？」真係畫到C君扯埋火，連老師都出馬叫佢正經啲！最後？兩幅畫當然都一塌糊塗，老師評價F級，毫無合作精神！唔通佢哋不和爭Do姐寵係真嘅？
番外篇：校長都唔放過，照玩！
終極劇透：Do姐現身！
「想賣甩Do姐？冇咁易。」Do姐竟然現身畢業典禮，嚇死佢哋！農夫當然受寵若驚，陸永仲話。「我要一世侍奉Do姐！」其間Do姐仲做咗個驚喜event，可惜監製話要賣個關子，想睇佢哋3個再鬥氣，惟有校鬧鐘準時睇節目吧！
