話說有觀眾覺得《嘩鬼上學去之農夫篇》第一集太胡鬧了，C君同陸永上堂冇厘認真，連老師都玩埋雖然好笑，不過好似有少少尊卑不分。好啦好啦！去到第二集，接連幾堂體力勞動，兩位仲有冇力去示範「嘴失禁」呢？睇畫面就知，今集主題絕對係「玩人變成被人玩」！
01 | 陸永尋獲「孖生細佬」！
英國教育模式講求全面，除了希望學生增進學術知識，亦鼓勵學生參與不同課外活動。農夫二子雖非運動健將，但難得來到英國，當然要試玩各式運動及課外活動。同場加映一段小插曲，陸永竟在學校尋獲「孖生細佬」？
02 | 板球初接觸
首次接觸板球運動，農夫在正式上課前還獲校長親自「過兩招」，獲益良多！經過一輪特訓，二人換上全套武裝，領教板球校隊真正實力。農夫未及回氣，隨即又試玩更加體力化、更多身體接觸的欖球運動。事前二人深怕與同學衝撞易受傷，不敢觸球，但經過抱摔、傳球等基本練習後，可有改觀？
03 | 扮熟打欖球 孱仔免問
今集多個體育堂，最難應付就係欖球訓練，講求衝擊力的運動，陸永同C君一個瘦奀奀一個唔夠高，即使開波前扮熟say hi，都難敵講求體力的訓練。拋波小兒科，但撞擊訓練先至見真章，結果陸永同C君都呃唔到自己，難以達標。
扮熟握晒手，C君已經被人玩番轉頭。
04 | Mud都還清光 身陷泥濘特訓營
體驗過激烈的球類運動，二人轉戰另類玩意－－ 跑泥漿。眼見同學們身陷泥濘，舉步為艱，渾身污跡仍開懷大笑，二人似乎難以投入、享受……好不容易擺脫泥坑！
同步追加，農夫教英文：
05 | 膽量試煉 高崖企跳
正當農夫以為可鬆一口氣，怎料更大的挑戰在後頭，接下來的項目竟是登山玩跳湖！二人勉為其難完成「入門級」挑戰，「同學仔」繼續由淺入深，一個接一個毫不猶豫從相當於三、四層樓高的崖壁跳下湖中，二子卻充當「跳水評述員」，可會「熬底」，臨場「縮沙」？