喪失工作能力係正常！回復至少要2日！
國際招聘公司 Robert Half 曾經訪問了100名擔任人力資源部總監的專業人士，調查一般員工「長假後需要多少時間才能回復正常工作狀態？」結果顯示，只有 8% 員工可於一日內回復狀態，過半員工需要2日時間才可以「康復」，有30%成「嚴重患者」更需要三至四天才可以回復正常！
假又放完，錢又使晒，工又要返，呢個樣點會好睇？ －－《行運一條龍》
「長假期後症候群」 7 大病徵
病徵 01 ｜疲倦失眠
玩足幾日，放低工作，你老細以為你乜都玩夠本，但實情係返工前一日完全瞓唔著，諗起公司陣味就想作嘔！
病徵 02 ｜胃口欠佳
食咗幾日party food，本身腸胃已經好唔妥當，一諗起公司附近啲頹飯，連平時用來唞氣的lunchtime都好似地獄！
病徵 03 ｜精神難以集中
平日工作期間，身體及精神狀況都被鍛鍊成為機械人，處於高度緊張狀態。放長假期或節日放鬆過後，就好似一個平時已經緊繃膨脹的氣球，因急速放氣而過度鬆弛，皺晒皮！
病徵 04 ｜焦慮、空虛
「幾時再放假？點解啲錢使晒？點解冇得加人工？點解冇bonus？」個腦成日諗埋呢啲嘢，完全運作唔到囉！
病徵 05 ｜不尋常肌肉酸痛
心理影響生理，不一定是返到辦公室坐姿唔正確，而係上述因素搞到腰頸無名有痛症，慘過勞損！
病徵 06 ｜心跳過快
因為未能及時適應緊張的生活節奏，缺乏了一個心理緩衝期，見到塞車人潮就心跳加速，出現了逃避工作的心態。
病徵 07 ｜容易發怒
「喂！放假去咗邊玩呀？」崩口人忌崩口碗，呢個時候老細仲用假期同你做話題，你會好想掃走枱面啲嘢然後同佢講：「我要放長假呀！」
到底有冇得救？
專家不愧係專家，對於以上情況，都會用老生常談去解救你點解決。
解救 01 | 適量運動令人更醒神
心理調節，可以由身體方面做起，可以嘗試做適量的運動，讓身體能從休假中重新起動。
解救 02 | 熱水浴令心情輕鬆
不要靠沉迷遊戲機或者煲劇作為紓緩，運動以外，可以透過熱水涼令心情放鬆。懶運動的人，也可以借此增強血液循環，紓緩疲勞。
解救 03 | 假期最後幾天 應該要有充分休息
心理學家建議，要紓緩「假期後症候群」，可將娛樂節目安排於假期早段，正式上班前幾天，最好有充足的休息，作為心理緩衝期，以調整自己的心理。
解救 04 | 有規律的生活，製作清單剔除不必要起伏
其實無論有冇工返，由於人類都是習慣的動物，長久保持安排有規律的生活（好似坐監咁），就可以將注意力從娛樂轉回及集中在工作和日常生活上。
去旅行係休息？！
你可以話去旅行係散心、係見識、係體驗，但休息？！咦？
係……休息唔一定係physical，但去旅行帶畀大家 physical 上嘅疲累真係大過返工！
「哲學家」謝曬皮表示： 「有種朋友好勁，可以朝早七點一落機就搭車去返工，我呢啲廢柴就要起碼唞成三五七日?，先可以回復番正常生活同開始按章工作?，連個 gib 我都要至少一星期後先有動力去unpack……」
