我成日都覺得，每一次用員工機票都係一場賭博，因為未到最後一刻，都唔會知道自己到底上唔上到飛機。
員工機票唔係任攞 機位冇保證！
員工機票嘅性質，大概係當所有普通乘客辦理咗check-in手續之後，如果有空位，就會畀員工check-in，而員工機票就會用年資深淺、員工本人定係家屬等等，來決定上機嘅先後次序，所以正常嚟講，你嘅年資愈深做得愈耐，你成功上到機嘅機會就愈高。
起飛前先攞到登機證
最近就帶咗爸爸媽媽去日本睇櫻花，一心打算去大阪，但係點知全日去大阪嘅航班都全滿，而員工機票輪候嘅同事大部分都係比我資深，基本上係肯定冇可能去到！
地勤同事表示：「如果你哋真係想去到大阪的話，我建議你哋去東京先，然後再轉內陸機去大阪，呢個係唯一一個有希望上到機嘅機會。」
聽完就即刻出咗三張去東京嘅機票再去輪候，喺知道結果前嘅五分鐘，睇到系統入面已經成功check-in，以為可以放心，點知轉個頭又再變番「候補」。最終就喺起飛前四十分鐘，登機程序開始咗嘅時候，我哋一家三口終於攞到登機證，開始狂奔入禁區。
每次都係一場賭博 隨時要改行程
有人上到亦有人會上唔到，每次用員工機票去旅行都一定要有兩手準備，特別係一啲唔係每日都有航班嘅情況，如果上唔到，就要即刻改變行程。
今次旺季去旅行挑戰成功，好似中咗jackpot一樣 ！