同朋友旅行 女友面前不可表現興奮？
之前讀中學同女朋友拍拖嗰陣，或者大家都係一齊咗冇幾耐，每日見面感覺都好新鮮、好甜蜜，好似見足 24 小時都唔夠咁。其間亦因為已經考完公開試，計劃好耐嘅畢業旅行亦即將準備出發，或者好多同學仔都經歷過，明白到第一次同一班老朋友唔再係困於學校、自修室，終於有機會一齊衝出香港輕鬆下。
就算依家諗番起，都真係未出發先興奮。「I am ready， I am ready！」
雖然我就出奇地興奮，但女朋友似乎就唔係咁睇。
「我聽日去台灣啦～～會去五日。」
「吓⋯⋯咁快到嘅⋯⋯」
因為之前都有同佢提過，只係估唔到時日太快。
「係呀，我哋一班男仔都等咗好耐喇haha⋯⋯」
「咁我呢~~你唔掛住我㗎？」
「當然掛啦！想帶埋你一齊去添呀！」
「係咪真㗎？」
「好想放你入個行李箱呀！」
「搞錯呀⋯⋯咁對我！」
「講笑咋，等陣食飯見啦～」
飛前要見面 旅程途中多報到
明知道聽日要飛早機，但夜晚始終都會見一見面，直到上機一刻，都仲係緊密聯繫！
「你去到要打畀我㗎！」
「當然會啦！」
而且當時 facetime 同語音通訊仲未發達，大家報平安都係靠漫遊卡，真係講句嘢都要嗱嗱聲！
不過有時旅行玩到得意忘形，返到酒店好夜先記得未睇對方訊息⋯⋯
「哼！又玩到唔記得咗我啦！」
「唔係呀～～剛剛先返到酒店有Wi-Fi咋~~」
雖然會有一啲小脾氣，但其實好快就會冇事。五日旅行好快就過去，嗰時女朋友仲話要第一時間見面，落機就一齊去食飯，但好景不常，真係no more delay ！
「佢話因為天氣唔好，要延遲呀⋯⋯」
「吓⋯⋯咁有冇話預期幾點？」
「未確定呀⋯⋯睇佢個勢應該都好夜，不如你唔好等我啦⋯⋯」
「唔得！今晚就要見！」
結果，真係延遲無極限，返到香港已經凌晨三點鐘，而最令我窩心嘅係，佢真係出咗嚟見我。
「好耐冇見喇我哋！」
「哈哈，都係五日啫～～」
「你有得玩就梗係啦，難為我一個人喺香港。」
「所以我買咗手信畀你呀：）」
「算你啦:P」
雖然我哋住得好近，只需要落樓行幾分鐘就到，或者咁樣並唔係咩大驚喜，但女朋友嘅舉動已經令我覺得好感動，嗰一刻雙方嘅感情，亦不知不覺間有所昇華～～～：）
PS： 大家又有冇呢種經歷呢～:)
個人動態:) Ig： hottofuzai
https://www.instagram.com/hottofuzai/
更多文章 fb： 熱豆腐仔
https://www.facebook.com/hothottofu/
.
=====================
歡迎加個人a/c:)
Ho ToFu
下一頁：激嬲女朋友的理由 | 旅行訂錯單人床
