網民呻台灣消費金好難用完：唔通去旅行都食連鎖店　附消費金攻略

台灣政府為了推動旅遊業發展，由今年5月1日起入境台灣的遊客，即可在機場抽取「$5,000消費金」，而使用方式則可選擇「電子票證」或「住宿折抵優惠券」。不過就有部份遊客表示因為能夠使用的地方不多，出現「有錢無埞使」的情況，亦有網民分享「用哂攻略」！

台灣消費金小薯茄4個抽就有一個人抽中 — 小薯茄4個抽就有一個人抽中（圖片來源：小薯茄）

台灣觀光局：每日派出1,000張

觀光局表示，由今年起到2023年底將抽出25萬名的自由行遊客，平均每日有1,000名遊客中獎。

網民批評：有錢無埞使

有網民選擇以悠遊卡領取$5,000消費金，指：「基本上得便利店同搭車可以無礙使用悠遊卡，很多小店甚至一啲連鎖店，例如手搖飲料店龜記、可不可等並不支援，大部份只收現金/Line Pay」、「大型百貨用唔到，食肆更加唔使諗，完全用唔到」、「成個信義區得KFC同Pizza hut收」等。

有用一卡通的網民就指：「真係幾難用得哂，好多地方唔收，臨走喺新東陽買手信先用到千幾蚊台幣咋，收一卡通嘅食肆係KFC，M記嗰啲….我做乜要去台灣食呢啲香港都有嘅連鎖餐廳」、「遊客心態都是想吃夜市小店，不過好多都唔收」、「台北嗰邊唔多地方用，基本上得便利店同埋交通用到」等。

網民攻略：台北車站買手信

有網民亦分享消費金使用攻略：「搭車都用到成千蚊，花蓮夜市有部分檔口收悠遊卡。剩低嘅有喺超市買台灣零食，便利店買嘢飲，同屈臣氏買護膚品化妝品，都易用哂。雖然可有啲嘢香港都有得賣，但免費又用得着就ok」、「主要係捷運公車全家藥房度用」、「買手信可以去台北車站嘅微風，大部分用到一卡通，不過記得買嘢食嘢前問用唔用到」、「喺SOGO、誠品、Watsons 用哂，一啲都唔難」等。