命運作弄人，好哋哋平時生勾勾，但總係放假去玩先嚟病……
喺出發前一日同女朋友食晚飯，已經開始有啲唔妥。
「唔食喇？」
「我冇乜胃口……」
女朋友見到我平時食好多嘢，好少做「大嘥鬼」，但今日竟然食得仲少過佢。
「你面青青咁，係咪唔舒服呀？」
「好似有啲作病咁……死啦……聽日我哋仲要去旅行呀……」
「咁我哋食完飯，你快啲返屋企休息啦～」
而今次亦好罕有地由女朋友送我去搭車。
正當我以為食完藥瞓一晚會好啲，點知第朝一起身就知出事了，
個人攰到傻下傻下……
而因為搭早機關係，女朋友主動 morning call 我。
「點呀……瞓咗一晚有冇好啲呀？」
「冇呀……好似仲病過尋日……」
「咁點算……使唔使去睇醫生呀？」
「應該趕唔切啦……我食粒藥頂住先啦……冇發燒應該都出到境嘅~」
「好啦好啦~~~你到咗打畀我啦~~」
由於我同女朋友住得太遠，完全係香港版嘅long D，所以惟有直接喺機場等。
「我到咗喇～你喺邊呀？」
「你望下後面～～」
呢刻女朋友喺後面偷襲我！
「哇……你真係好病呀……」
「我就嚟唔得喇……我下半身就交畀你啦……」
我指一指自己對腳，示意要佢揹我。
「咁我應該會死得快過你……」
「講笑咋衰妹，我哋去check-in先啦~~」
食完早餐，喺閘口等上機嘅時候已經瞓到死豬咁，而女朋友亦借個膊頭畀我靠住瞓。
冇錯，成件事就好似角色掉轉一樣。
「上機喇，上機喇～～～」
「吓……嗯……哦……」
由於食完藥搞到成個人拾下拾下，一路落機到過關入境，直至去到酒店，我都係靠身邊呢個女仔幫我打點……
而且期間我都係瞓到豬咁樣。
冇人同佢傾偈、冇人陪佢感受身邊嘅事，就好似變咗一個人去旅行咁……但過程中佢都冇嘗試去打擾我，
嗰一刻，我直頭覺得佢好有母愛，
同時，亦令我更加愛佢~:)
初時，我仲以為平時只有我照顧佢~~
但呢刻發現旅行期間全靠呢個女仔照顧我、提點我，先叫做順順利利、冇穿冇爛咁開始我哋嘅旅程。
個人動態:) Ig： hottofuzai
https://www.instagram.com/hottofuzai/
更多文章 fb： 熱豆腐仔
https://www.facebook.com/hothottofu/
=====================
歡迎加個人a/c:)
Ho ToFu
https://www.facebook.com/hottofuzai
