去旅行住青年旅館，情侶中途頂唔順搬走

「去旅行是為了更了解世界，也更了解自己！」所以近年好流行幾十日嘅深度遊。但為咗節省長時間旅遊嘅旅費，都會選擇住hostel青年旅館。相信大家都上網睇過唔少分享，青年旅館有幾咁美好，可以識到外國朋友，又可以同大班年輕人一齊生活，得閒煮下嘢食，幾寫意。

不過老實講，呢種青年旅館唔係人人都適合住。話說某次同一班朋友去新西蘭旅行，大家為咗節省旅費決定住hostel，其中一對情侶頂唔順，旅程中途就自己搵酒店自住。

以下係幾樣理想與現實相差比較大嘅差別，如果你有興趣想試住hostel，就要有心理準備。

01 | 衛生問題

由於青年旅館幾乎所有地方都係共用，包括廚房、浴室，就連睡房都有16人一間嘅睡房，所以個人衛生好重要。

喺香港人嘅生活標準嚟講，外國人嘅生活習慣唔太衛生，例如你會見到好多人唔沖涼著住牛仔褲、恤衫就瞓覺，朝早出門口前先沖涼。廚房好多餐具唔洗乾淨，雪櫃係超市用嘅大冰櫃，入面有倒瀉嘅牛奶、可樂、流緊血水嘅肉……

頭先亦講過，整間青年旅館都係共用空間，房間未必有私人插頭，所以想叉電話、電腦、相機就必須帶「分插拖把」。

不過亦有機會被霸晒所有插頭，被迫去共用客廳或廁所充電。外國長時間旅遊最珍貴嘅兩樣嘢就係Wi-Fi同插頭，喺機場、火車站不難發現有人用插頭充緊手機。

能夠去外國旅行，識到外國朋友係一件開心事，但說穿了某啲人只想炫耀，自拍張合照擺上網話畀人知識到外國人。你從來唔會喺香港主動識朋友，但識到外國人就好威威……

喺外國人眼中，識到一個亞洲人並唔係一件咩事，所以佢哋冇興趣亦唔會主動去認識你。外國人亦冇想像中咁熱情，或者佢哋根本唔想認識你，或同你結伴旅遊。如果想結識外國人，可能真係要睇緣分。

當然，以上例子有人會接受到，亦有機會認識到熱情嘅外國朋友。但千祈唔好對hostel有太大期望，免得希望愈大，失望愈大。