每次去完旅行返到香港，都會有後遺症

我相信大部分香港人都患有「不去旅行會死」嘅絕症，仲要係末期！所以每年都最少要去番一次旅行醫病。喺香港生活，就好似困咗喺個死局一樣，一出世已經要計劃買樓，連生育都要計埋射精日期。

不過，雖然只要去個旅行就立即藥到病除，但返到嚟香港，總係有唔少「後遺症」。

01 | 唔想返工到懷疑人生

平時我已經唔想返工，但去完旅行之後，呢種抗拒返工嘅感覺會激增十倍。當我望住飛機靠近香港機場時，就會不停問自己：「到底點解為乜要返工？點解我嘅人生要咁痛苦？」所以好多打工仔選擇喺旅行之後請一日病假，都係合情合理。

去旅行嘅方式、口味，大家都唔同，有人鍾意窮遊、有人鍾意深度遊、有人鍾意食玩瞓……我個人嚟講係後者，而我老婆多我一樣嘢，就係「食玩瞓買」。

去到陌生嘅國家，唔知點解，胃口會變得特別大，見到乜都想試食。返到香港，低頭望一望幾個月懷胎，但個胃口變大好似食極唔飽，要減肥就難上加難（仲要清埋去旅行買嗰堆零食）。

唔知點解，去旅行時購買慾特別大，見到任何嘢都覺得非買不可，有今生冇來世，知道平過香港成截，結果又買咗返嚟。尤其係日本呢個邪惡國家，佢哋好擅長將啲無謂嘢包裝到好靚。有個朋友去完東京，就成套和服買咗返香港，明知根本冇機會著……

呢樣係最慘嘅一樣，如果去啲長途旅行，需要請晒成年嘅大假，返到嚟望住個月曆，計住下年點樣分配假期。最慘係，多得網上每年都有「請假攻略」，好多熱門假期都要同其他同事爭崩頭。

雖然咁多後遺症，但我都會堅持每年至少去一次旅行，除咗咁辛苦工作需要去旅行放鬆一下，更重要嘅原因，係想離開香港呢個高壓地方一陣……