千祈唔好畀女朋友同一班女仔去旅行

因為我大假已經用光光，女朋友又剩番好多日，於是佢就同一班女仔去旅行，目的地係韓國。原本我以為只得女仔同遊，應該唔會有咩大問題，點知……

女生同遊血拼收穫大唔識路靠「女人直覺」

幾日後佢返到嚟香港我去接機，見到佢嗰剎那我仲以為佢變咗隻駱駝，除咗個行李箱之外，仲攞住幾大袋戰利品。返屋企時聽佢講嗰幾日嘅行程，原來一班女仔去旅行係咁恐怖。講番女朋友今次行程，起初我仲驚佢幾個女仔會蕩失路或唔識搭地鐵，點知女朋友話：

係啊，我哋真係唔識路去地下街，因為冇人識睇地圖，只能夠望下邊度似有衫賣，啲人群向咩方向行，我哋就搵到喇～

原來女仔購物慾，可以強到好似隻獵犬追蹤動物咁……

另外，女朋友講話，今次冇咗一班男人阻頭阻勢，呢樣又話唔抵，嗰樣又話唔靚，買衫買得好自在。為咗降低買得多嘢嘅罪惡感，佢哋會互相讚對方揀嘅衫好靚，令每件衫都有「非買不可」嘅錯覺，結果就買咗一大堆戰利品返香港。

行化妝品店，我每次都等到喺店入面瞓着咗，瞓醒見佢仲試緊……而家成班女仔可以試到夠皮，仲可以互相交流化妝技巧，邊隻色唇膏襯，眼線應該點畫……

「情況就好似你哋成班男人圍埋一齊砌高達咁囉！！」女朋友。
「你都黐線！男人砌高達邊會交換啲手手腳腳嚟砌……」
「總之就……差不多係嗰種爽歪歪，如入無人之境嘅感覺啦！」

「咁即係冇咗我仲開心啦！可以瘋狂買嘢！」我含淚咬唇咁向女朋友怒吼。
「唔係啊，冇咗你喺身邊，半夜冇人陪我去廁所，食飯冇咗你呢個大飯桶，韓國樣樣都咁大碟，選擇少咗好多。同埋唔知點解，同你去旅行個感覺好似開心啲。」

「但係你望住堆戰利品時，個表情唔係咁講喎！！」
「我有買手信畀你呀！」
「真係？」
「係啊！你而家試下好唔好睇。」
「好啊！」

當我興高采烈想除晒身上所有衫褲，變身成韓星look之際，女朋友喺行李箱攞咗件手信出嚟……
我一望到虎軀一震！
原來係幾對韓國賣1,000won嘅襪仔……