今日見到多雲，個fd又放飛機，即刻搭車上大帽山，就係博大霧，體驗另一番風味。

因為喺元朗，所以搭54到上村轉51(另外一個比較方便嘅方法就係喺荃灣西或荃灣港鐵站上51，喺郊野公園站落車，應該全世界都係喺呢個站落)。

落咗車向住呢個方向行一分鐘就到入口。今次因為得一個人，唔直接行晒成段麥理浩徑8段(大帽山至鉛礦坳)，只係行少少就落番川龍。

沿車路直上。

唯一補給點同廁所位~大帽山士多。

何謂冰火？就係行緊上山，我個身入面出晒汗，出面勁大風又吹到頭都痛，我頂帽都被吹甩兩次。

成條路上山頂都係平路，今日個景就係睇霧。

自拍一張，冇落雨，但成頭、成身，所有嘢都濕晒。

呢度已經係正常人行正常路去到最高處(大帽山係唔可以去最高處)。

之後調番轉落山，過咗呢道閘就唔可以畀車上去。

有啲唔夠喉，見川龍就快又係落山，諗住跑落去，但之後係堅後悔。

沿路會經過青年旅館。(認真，咁山卡啦搵鬼去咩！)

一開始都係車路，到咗青年旅館之後就變樓梯同小路。呢個時候落勁大雨，搞到我係咁跑落山。

前面就係青年旅館。

跑咗十幾分鐘終於細雨咗，不過啲路濕咗都唔係易行。

落到底就接番車路。

終於見到個亭可以避下雨，仲見班中童上山諗住露營。

行多兩公里就入咗川龍，好好奇點解喺個交通不便地方都做到燒烤場生意。

行多十分鐘就到村口，完成今次旅程。走嗰時可搭小巴80或巴士51落山。

是次行程紀錄，時間：3小時。

注意事項：
1.平日唯一上大帽山交通工具51係一個鐘一班，請喺出發前事先開定九巴app睇定開出時間。
2.大霧時方向難認，如第一次行請行大車路上頂，如不原路落山，最快出口會去到一個亭，之後左邊有路落梧洞寨瀑布，起碼4小時。
如有任何疑問可電郵：[email protected]或ＰＭ我