Do姐訪成億裝修Gucci 買鞋遇上優質售貨員
節目中，Do姐表示經朋友介紹到訪位於中環、近月裝修完畢重開的「意大利名店」，雖然她沒有說出口，但好明顯就係講緊Gucci，表示除了參觀近億元裝修的店面之外，亦打算去睇睇啲loafers鞋款，點知一入到去又唔係好多，有啲失望：「佢（售貨員）就話唔緊要，可以訂，即刻就畀我睇嗰啲皮，同埋嗰啲皮，有金扣有銀扣，佢話：『你著重37.5碼吖嘛？』呢啲就係好嘅Sales喇！」Do姐稱自己並非經常幫襯，與該位名店售貨員亦只見過幾面，曾款待過自己，但由於對方記得自己的鞋碼，所以笑言原本唔打算買，都會睇睇啲皮：「經驗老到，係成功嘅Sales！」
4大服務業禁忌
Do姐讚完名店售貨員之後，她與幾位主持人例如余迪偉以及余德丞等就開始探討「反面教材」，主要可以歸納為以下四點。
1）吊靴鬼咁跟到實
第一個弊病，相信大部分人都會有經驗，就係一入鋪頭，就有一位售貨員由頭跟到尾，不停向你介紹，幾乎拎起每一件貨品都要講解或推銷，Do姐表示：「我就係唔鍾意，一入到去就跟喺後面，我鍾意好優閒！」余迪偉再補充：「佢哋會話『埋鏡拼拼啦』，一定係懶音，『啱可以試喎』！」
2）用明星做賣點
另一方面，幾位主持又表示有不少售貨員會以「明星都有買」「明星都嚟睇過」作為一件貨品的賣點，尤其見於地產界。然而他們都表示對此很反感，表示每個人的購物準則都不同，亦不能夠因為某人有買/用就代表適合每一個人，迪偉更斥這明顯是「冇做功課」的行為。
3）意見唔夠中肯/Hea
提到交流方面，Do姐表示有時購物都會感到迷惘，所以會向售貨員問問意見，而且其意見不能夠不中肯：「如果佢畀嘅意見係唔OK呢，咁我就一對都唔買喇！」余德丞再具體補充，表示有曾經遇過一些售貨員，每一次貨品都只會話「幾好」「OK」，令到客人更加迷惘，此行為要不得！
4）介紹親都係最貴
貴，就並不代表一定好，但做服務行業就切忌會以都向客人推介「最貴」的產品，余德丞就分享了很一次食西餐的經驗，當他向侍應提問推介時，豈料對方卻將餐牌上最貴的菜式作為推介：「唔肯定係咪最好食，總之就係最貴。」迪偉的經驗更離譜：酒樓都係咁，我嗌個例湯，你就知我咩價位啦，點知一嚟就鮑參翅肚！」實在好反感！
網民極同意：吊靴鬼真係好乞人憎！
Do姐開咪讚Gucci sales引起大批網民熱烈討論，不少人都指出「吊靴鬼文化」是香港獨有：「其實係香港先會係咁跟住妳，又或者不停推銷產品！非常討厭！在外國完全沒有問題！」不過就有網民點出問題所在：「其實sales都唔鐘意吊住個客介紹呢樣嗰樣，係啲大公司有一套所謂客戶服務嘅流程，唔啱都要不停介紹貨品，又成日有神秘顧客，只要你做少咗一個步驟，你就大鑊啦！」
網民分享名店購物體驗：最仆街嘅sales當屬Chxxxl！
其中有網民提到自己最糟糕的名店購物體驗是來自於女士們最愛的品牌Chxxxl，「咁多名店sales Chxxxl 應該係最PK！」意外引起其他網民共鳴：
「我試過入Chxxxl問有冇背囊，個sales一句野都冇講指咗一下一個老遠嘅背囊就完咗。」
「因為你唔買，大把人買，所以無需服務。」
「如果你dress code 好少少，Chxxxl都好好service的，最寸係Ocean LV，寸到話要投訴先serve 你，總之要好高調先理你。」
名店Sales上水留言：如果我唔跟，一陣又俾人唔知鬧幾耐！
而「吊靴鬼文化」亦成功吸引了部分於名店工作的Sales上水留言，直言「搵食艱難」：
「其實我都唔想跟住大家，但我份工上司係要逼我咁做，所以大家可以當睇我唔到，我亦會係側邊借啲意扮下摺衫等大家都攞到個平衡，大家都舒服，你有需要我又即刻幫到你！」
「以前做嗰間公司，要求10秒內行到去客人面前，仲有每個月同你玩神秘客人寫報告，試過跟到俾客鬧，我直接同客講，我話你唔洗理我㗎，你有你睇就得，如果我唔跟，一陣又俾人唔知鬧幾耐㗎！之後個客同我講okok！」
「其實唔係想跟住個客，唔係想sale最貴嘅嘢，只係迎合公司要求嚟做，有神秘人要每一樣嘢都唔可以介紹少，如果唔係又要扣錢，返工係為咗搵錢！」
