美斯缺陣 惹全場觀眾憤怒
球王美斯難得到訪香港踢表演賽，吸引大批球迷入場，有不少球迷更指是專程為了美斯而來。不過到比賽尾段，無論美斯定蘇亞雷斯都沒有上場，令觀眾們都感到非常憤怒，噓聲四起，齊齊大叫「回水」宣洩不滿。其中更有球迷在場外「打卡位」中，用跆拳道飛踢，踢走美斯宣傳板頭像，可見在場觀眾們都非常失望。
國際邁阿密主帥馬天奴：美斯肌肉發炎多日
賽後記者會國際邁阿密主帥馬天奴表示感謝香港近日的熱情接待，解釋美斯無上場令球迷失望，希望見諒，其原因係教練團隊與醫療團隊一同決定，因為美斯肌肉發炎已維持多日，情況未有好轉，而蘇亞雷斯同樣膝部發炎。
美斯一早有傳受傷？賽前半價放飛
據報導指出，國際邁阿密2024年展開全球巡迴表演賽，首站已出現門票銷濟的情況，當時合約已包美斯會上陣20分鐘，而香港合約反而無包，合約僅承諾「大牌球員」會登場。對於美斯受傷一事，球迷都半信半疑，而早前曾有報導指出美斯訪港前沙特阿拉伯與艾納斯交手時已有傷，二頭肌出現不適，當時已經時最後7分鐘才入場，原本已打算讓美斯休息。而2月2日時開賽前夕，本來被炒高2－3倍的門票，突然有唔少人以半價出售，甚至有原價$2,280的門票變$2,200 2 張！有唔少網民都分析事件根本一早就預美斯唔會落場！
TVB女星們齊表不滿 前港姐發言最獲共鳴
今次美斯訪港同樣吸引到一眾圈中藝人到場捧場，包括TVB女星高海寧（高Ling）、馬國明、湯洛雯、陳庭欣和陳智燊等人。對於未能看到美斯出場一事，一眾女星都表示非常失望，高海寧就在社交平台上傳現場噓聲四起的片段，並發文指：「Messi無落場 Sarah hold足全場 Good Job」，一齊睇波嘅湯洛雯就留言回應：「我要返去睇《少林足球》balance吓」。而前港姐陳庭欣就發文指「#違反商品條例」，仲話好多球迷都要求要報《東張西望》！
鍾培生要求特首主持公道
同樣有份到場捧場的鍾培生，事後在個人社交平台嬲爆拍片，表示要求特首李家超為大家主持公道：「我建議特首挑戰碧咸，打返場拳賽，為香港人攞返個公道，No bullshit. Let’s go!」大批網民都認同特首要為大家討回公道：「呢鋪真係要」、「鍾生果然係香港唯一希望」、「支持呀！」、「商品說明條例！大陸主辦方都會退錢賠酒店機票，Talter過分到連通知都冇通知」等。
政府發言人：極度失望！
據傳媒報導，香港與國際邁亞密的合約文件上，寫明球王美斯最少會上場45分鐘，與其他地方的合約相同，除非因醫療問題未能上場。而在前（3/2）的公開訓練中，已經比賽當天早上，國際邁亞密仍然表示美斯會上陣，可惜在表演賽開始才突然表示美斯未能上場。而港府曾就事件要求美斯露面與球迷「講幾句」或在打招呼，可惜不獲接受。
事實上，對於美斯未能落場，政府發言人表示，政府和一眾球迷同樣對主辦單位的安排感到極度失望，主辦單位欠球迷一個解釋。發言人又說，大型體育活動事務委員會會根據協議條款與主辦單位跟進，包括可能因應美斯未能出場而扣減贊助款項。為此，主辦單位Tatler在當日晚上發表聲明，表示對於美斯及蘇亞雷斯未有上場比賽感到失望，又指出在比賽前沒有收到任何有關二人將會缺席比賽的消息。
球迷都湧入Tatler大鬧 KFC成為最大贏家？
有唔少球迷都湧入Tatler IG聲明中留言大鬧，表示不接受解釋，而且好似將個波推落國際邁阿密度咁「如果合約根本無保證佢地會出場，你地賣飛時應該公開透明比人知！你係主辦方，唔好講到你地做義工咁好遺憾啦，你有賺錢架」「咁你合約有冇指定美斯要上場先？你宣傳時又話會上場嘅？」「錢你就收晒啦，責任全在美斯」「負傷唔踢 – 明白，Say個hi打個招呼都無喎Tatler! 咁請問點解釋？」又有球迷表示入場貴都算，仲要買咗500幾KFC，事關場內的KFC店都有加價助慶，一桶雞賣緊$500幾「三千幾買張飛，仲要捱貴嘢食，仲要冇美斯睇」「KFC 又贏」「我哋香港人好有錢, 5百幾蚊一桶炸雞都食得起」「香港真係賺錢地方」「唔講以為去咗日本」
港人震怒：香港變國際水魚中心！
事件令全港市民關注，甚至留言表示：「海關要跟進下，違返咗商品說明條例，應該要回水。」、「2024年中國香港第一件盛事，依家變咗一場鬧劇！」、「其實點都講唔通㗎喇！你一早唔想俾美斯落場就唔好喺啲海報有美斯個樣，唔好攞美斯嚟賣廣告！」、「其實最大責任係賣飛嗰個，掛羊頭賣狗肉」、「美斯因今次事件劃花個名，以後唔會再有贊助商贊助佢，損失收入數以億計！」、「下次唔好再攪比賽。好多人怕怕了。下次其他球星又話受傷，球迷全冇保障。」、「唔使去大球場啦！淨係睇梅西一個人 下次直接紅館開show」、「睇個態度好明顯扭計唔俾面，因咩事唔清楚，不過對佢印象有點失望……」、「國際水魚中心」。
楊潤雄、黃德森記者會：下半場應承咗會出場
文化體育及旅遊局局長楊潤雄和體育專員黃德森今日（5日）就事件舉行記者會，表示主辦方一直承認美斯會落場，就算上半場無，下半場都答應了會出場，一直有同主辦方緊密聯絡，最後完場前10分鐘確認美斯因為受傷不能出場後，都有要求主辦方作出補救的措施，希望主辦方繼續同球隊溝通。局長認為主辦方要出來解釋，美斯受傷的程度係咪去到唔容許佢落場？被問到局長係咪卸膊時，局長就指佢哋有做足本份，與球隊溝通係主辦方的責任。唔少網民都形容今次記者會係「乾淨利落記招」，將全部責任歸咎主辦方。
