原文刊於《東方新地》｜編輯：RA｜圖片來源：新傳媒圖片、電視截圖
方東昇《這麼遠那麼近》11大金句
再主持旅遊節目《這麼遠那麼近》
無綫新聞主播方東昇一向有「金句王」之稱，近年有份擔綱節目《長命百二歲》及《世界觀》都頻爆金句，極受歡迎。方東昇全新旅遊資訊專題節目《這麼遠那麼近》近日在無綫推出，由他帶你遊遍泰國、美國、重慶及巴基斯坦4個地方，探討交通問題之餘，佢繼續狂爆金句，一集三十分鐘，真係愈睇愈過癮！
早於5月，《這麼遠那麼近》已在無綫新聞台播出，每集時間為3分鐘，但方東昇仍日日有驚喜，節目中狂爆搞笑金句，從未令觀眾失望。而今次節目就改為一星期5集的30分鐘版，一連十集由8月31日起在翡翠台播出，讓觀眾可以一次過睇足半小時！
1. 重慶唔止有著名的「天梯」，仲處處係樓梯。
2. 不過唔係每條樓梯都可以行得好似「天梯」咁浪漫。
3. 一條兩路口嘅樓梯，有209級，相等於十層樓。這麼遠，那麼都係遠。
4. 呢條長命樓梯，真係長命百二歲都未必行得掂。
5. 行一次天橋慳好多時間，但死好多細胞。
6. 我哋遇到唔少同路人，同樣迷路嘅人。
7. 不少道路甚至會穿樓，不驚不覺就走過重慶森林，重慶石屎森林。
8. 以前唔想行可以坐登山纜車，而家登山改坐扶手電梯。
9. 要先跨過心理關口，先可以跨過樓梯口。
10. 佢無論上落都緊握扶手。
11. 對於我哋呢啲又要威又要坐電梯嘅人嚟講，兩分半已夠長，最緊要都係平安到站。
擅長搞爛 gag
由新聞主播 方東昇 做主持的資訊節目《世界零距離》、《世界零距離II》後，無綫再推出過《世界零距離III》，介紹一些較偏遠、鮮有港人去旅行的國度，加上方東昇在節目中一改嚴肅形象，旁白方式生鬼有趣，並加入大量搞鬼爛 gag 金句，小編都要叫佢一聲「昇爺」！
「Gag王」方東昇好笑金句合集
在年前播出的《長命百二歲》第二季，同樣都有精警金句，一齊睇下啦！
1. 世界最大的空間，就是進步空間。
和80多歲的長者打網球的方東昇，展現出笨拙的身手，此時他就爆出一句「世界最大的空間，就是進步空間」，自嘲功力一流！
2.西洋味，不離地。
除了有含意的金句外，方東昇亦相當擅長押韻，一句「西洋味，不離地」，直頭可以做今季的副題！
3. 再鋒利的刀都有生鏽的一天，再厲害的風車都有停下來的一天。
有「中大才子」之稱的方東昇遇著不轉動的風車，當然不會放過講金句的機會！
4. 忘記或許有忘記的好，他的世界不再有煩惱，在雨中也可翩翩起舞。
談到失智的長者，他發人深省的金句不但令悲哀的感覺沖淡，更予人一種安慰的感覺，好句好句！
5. 失智事小，失蹤事大。
6. 蹺埋雙手，就是幫手。
7. 有想像力就有生命力。
8. 按照世衛標準，45歲或以上先係中年，所以我仲係大好青年。
9. 慢慢嚟唔好急，我哋唔會催人，歲月先有資格催人。
10. 未必人人可以做明星，但只要努力，就有機會做精英。
11. 見到你（李德成）就好似以前馬王「步步友」咁，「步步有力」呀！
12. 室雅何須大，不過，如果室又雅又大，可能仲好。
13. 香港人講求唔好急，最緊要快，而台灣人就係「慢慢來，比較快（國語）」。
14. 人生七十古來稀，八叔一百都OK。
15. 想食乜可以自己揀，所以食嘅都係開心樂園餐。
16. 有髮不能不「執」，有請執「髮」部門。
作為主持人就咁搞下gag都未夠，反應力都好重要，轉數快人都醒目啲，就好似方東昇咁，有一集佢去探訪老人院時，負責人表示要老人家唔使再用約束帶，畀佢哋培養自主權，所以過去已燒毀幾千條約束帶。方東昇第一個反應就係：「好像林則徐燒鴉片一樣。」
「中大才子」 一級榮譽畢業
方東昇節目中的金句令人津津樂道，大受觀眾同網民歡迎。唔講唔知，呢位「爛gag」主持本人好有料到！方東昇有「中大才子」之稱，98年加入無綫新聞部，99年畢業於香港中文大學新亞書院新聞及傳播學系，並以一級榮譽畢業，更獲得新亞書院獎學金最高榮譽誠明獎。為人不但風趣幽默，而且又有內涵，難怪咁出位！
初戀女友變老婆
方東昇在《世界零距離》中搞過「抱得美人龜」呢個食字gag，而佢本人早在2006年已經「抱得美人歸」，另一半係舊同學主播吳先瑩的妹妹吳先玲，仲係方東昇的初戀情人！方東昇26歲才開始初戀，一個條件咁好的人，之前竟然從未拍過拖，連身邊朋友都難以相信。
話說早年另一主播吳先瑩結婚，同學兼同事的方東昇為婚禮擔任大會司儀，結果就遇上為姐姐做伴娘的吳先玲。方東昇對吳先玲一見傾心，展開猛烈的追求攻勢，例如參加女方的教會聚會，爭取見面機會。最後成功「抱得美人歸」，亦成為了基督徒。
外母早認定方東昇做女婿
作為「才子」的方東昇，原來另一半亦非常厲害，外表斯文的吳先玲係一位運動健將，小六時已加入香港乒乓球代表隊，為港爭光。不過因順從爸爸的意願，所以在中文大學英文系畢業後，就成為了中學老師，任教英文。而吳先玲與方東昇未認識之前，有日吳媽媽在電視上睇到方東昇報道新聞之後，大讚：「這小伙子真不錯，我有這樣的女婿就好了！」結果吳媽媽的願望竟能成真撞正口卦，相信佢一定好鍾意呢個女婿。
方媽媽係才女 徵文比賽奪冠
方東昇除咗對老婆好，仲係一名孝順仔。由於做主播，收入都算穩定，方東昇2000年就決定同媽媽聯名買樓，以268萬買入青衣海欣花園一個單位，婚後仍與母親一齊住。有個「才子」囝囝，方媽媽一定好安慰。不過，原來方媽媽都係一名「才女」，同囝囝一樣文筆極好，仲曾經在公開徵文比賽中贏得冠軍，果然係「有其母必有其子」。
方東昇係兩婆媳「共同敵人」
雖然方東昇經常要周圍飛，做採訪工作，但老婆同媽媽相處非常融洽，冇乜拗撬，令佢非常放心。方媽媽在一篇名為「方老太寫給方太的信」中透露，兩婆媳有共同興趣，鍾意一齊下棋打乒乓波，亦有共同敵人 — 方東昇！方媽媽話方東昇經常掛住工作，唔肯休息，所以兩婆媳就會夾計迫佢唞，好有默契！「才子」方東昇有個好老婆之餘，又有個咁叻咁有才華的媽媽，真係令人羨慕。最緊要係一家人可以相處融洽，冇婆媳糾紛，好幸福！
還有什麼演唱會消息？
無論是本地歌手還是外地歌手都即將在香港舉行演唱會，即睇：演唱會時間表及購票資訊，包括MIRROR演唱會門票兌換安排、容祖兒、鄭秀文、張學友、鄭中基、溫拿、羅志祥等。