教你如何快閃台灣48小時【小琉球篇】

快閃台灣48小時，打工仔最高境界，完全冇請過假。好多人會選擇weekend去下台北、台中，食下牛肉麵行下夜市，有冇諗過周末48小時足夠去台灣嘅離島小琉球浮潛睇海龜hea番下？要玩水就玩水，要攤屍就攤屍，仲可以玩SUP、獨木舟、潮間態生態遊、BBQ、踩單車環島、喺沙灘聽音樂飲啤酒睇女仔，島細細想點就點。

6點收工坐夜班機尾班機少延誤

要快閃小琉球，首先，星期五要準時 6 點收工，即刻衝去機場坐港龍航空，有班21:10起飛去高雄嘅航班，到達高雄只係23:40，行內人都知呢班機好緊要，由於高雄機場夜晚會閂門，所以高雄呢班最後航班要趕住喺高雄機場閂之前降落，所以比較少delay flight。

住民宿遊夜市休息過後再出發

到達高雄之後，馬上返去民宿休息，我幾乎每次都係住BriQue Hostel，又平又近新堀江，200幾蚊單人房去邊度搵，落機肚餓仲可以去新堀江夜市買個宵夜食，第二朝一早出發去小琉球。
小琉球嘅民宿大多非常貼心，可以幫手安排喺高雄小港機場或市區前往東港碼頭嘅接駁車。另一方法就係坐捷運去到高雄車站，過對面馬路坐港都巴士直接去東港碼頭，每位NT150。